Link açıqlığı

İslâmov: ATR telekanalına ayırılğan paralarnı alacağımızda şubelenem


ATR qırımtatar telekanalınıñ saibi Lenur İslâmov

ATR telekanalınıñ saibi Lenur İslâmov, telekanal muarririeti bu sene ükümet tarafından maliyeviy destek alacağında şubelengenini ayttı. Bunı o 7 dekabrde Qırım.Aqiqatqa bergen izaatında bildirdi.

«Biz bu paralarnı bu sene alacağımızda pek şubelenem. Alıp olsaq ta, iç bir şey satın almağa yetiştirmemiz. İlk evelâ Maliye nazirligi pasportnı imzalamaq kerek, soñra hazine esabatı açılmaq kerek. Bunıñ episi – 20 dekabrge yaqın», – dedi İslâmov.

Ukraina Nazirler şurası ATR qırımtatar telekanalına maliye sermiyalarınıñ ayırlmasını uyğunlaştırdı. Bu aqta qarar 7 dekabrde ötkerilgen toplaşuvda qabul etildi. Bu mevzuda Urkaina İçtimaiy siyaset naziri Andriy Reva esabat bergen edi.

Ukraina Yuqarı Radası noyabr 17-de olıp keçken umumiy toplaşuvında Ukraina Nazirler şurasına Qırım Muhtar Cumhuriyeti ve Aqyarnıñ teleradiokompaniyalarına devlet bücetinden maddiy yardım köstermege imkân berecek №5333 qanun leyhasını qabul etken edi.

Ukraina halq deputatı Refat Çubarov Yuqarı Radada çıqışta bulunıp, 35-36 million grivna maddiy yardım aqqında laf ketkenini aydınlattı.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ işğal ve ihlâq etilmesini qanunsız areket olaraq tanıdılar. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG