Çarşenbe künü, dekabr 7-de, Qırımtatar Milliy Meclisiniñ reis muavini Ahtem Çiygoznıñ daa bir mahkemesinde Petrov tahallüsini alğan gizli şaatnıñ sorğusı devam ete, dep bilidre Qırım.Aqiqat mühbiri.
Yaqalanğannıñ advokatı Nikolay Polozovnıñ aytqanına köre, saqlanğan şaat «baltalarnen tolu paketlerni körgenini ayttı: eki paket bar edi, er biriniñ içinde onğa yaqın balta, ve bayraq tayaqlarına lesker qolları dedi».
Şaat Meclis prezidiumınıñ toplaşuvı aqqında da tarif etti.
«Çiygoz (narazılıq bildirgenlerniñ – QA) arqa sıralarda olğanını ve anda gençler olğanını ayttı, Çiygoz olarğa bir şeyler ayttı (tam olaraq ne aytqanını şaat bilmey), bir şeyler kösterdi (şaat nasıl etip yapqanını bilmey), ve Refat Çubarov Çiygozğa Qırım qoşulması meselesi baqılacaq sessiyanıñ keçirilmesine yol bermemek içün insanlarnı toplamağa buyurğanını bildirdi. Bu mesele evelden baqılmadı, sessiya başqa mevzularğa bağışlanğan edi», − dep qayd etti advokat.
Bugün gizli şaat qırımtatarca bilgenini ögrendiler.
«Başta mahkemeciler bunı teşkermeycek ediler, soñra men Çiygozğa qırımtatarcadan tercime etecek insannı bermege rica etti. Olar vaqıtnı coyacaqlarını añlap, razı oldılar», − dedi Polozov.
Advokatnıñ tahminlerine köre, gizli şaat Zaur Smirnov ola bile, çünki «o, Çiygoznıñ oña qırımtatarca aytqanlarını tercime etip cevap berip oldı. Aynı vaqıtta Çiygoz Yaltada qullanılmağan ibarelerni qullandı ve şaat cevap berip olamadı».
Ahtem Çiygoz 2015 senesi yanvar ayında 2014 senesi fevral 26-da Qırım Yuqarı Radasınıñ binası ögünde keçirilgen Ukraina topraq bütünligine qoltutuv mitinginde iştirak etkeni içün yaqalanğan edi. O vaqıt Rusiye tarafını tutqan, bu cümleden «Russkoye Yedinstvo» («Rus Birligi») firqası, miting iştirakçilerine qarşı çıqtı. İşğal olunğan Qırımnıñ Rusiye akimiyeti onı kütleviy çatışmalarnıñ teşkil etmesi ile qabaatlay.
Rusiye mahkemesi «Çiygoznıñ işini» «fevlral 26 işi» çerçivesinde, iyül 20-de mahkeme qapalı toplaşuvda «fevral 26 işini» ekige bölgen soñ oldı: ayrı – Ahtem Çiygoz boyunca, ve ayrı – cinaiy iş boyunca qabaatlanğan Ali Asanov ve Mustafa Degermenci boyunca.
