Ahtem Çiygoznıñ ömür arqadaşı Elmira Ablâlimovanıñ fikirince, «Çiygoz davasınıñ» ükmü ancaq 2017 senesi fevral ayında çıqarıla bile.
«Zarar körgenler daa sorğuğa çekilmedi. Mahkemege kelmege istemegenler ve qabaat tarafınıñ gizli şaatları qaldı. Olardan soñ imaye tarafınıñ şaatları kele. Biz Nikolaynen (Polozov – QA) esapladıq, ancaq fevral ayında ükümge kelirmiz. İşniñ üçünci yıllığı arfesinde netice çıqarmağa isteyceklerini tahmin etemiz – qapatacaqlar», – dep ayttı Ablâlimova Qırım.Aqiqat saytına.
Onıñ bildirgenine köre, Qırımtatar Milliy Meclisiniñ reis muavini davasında aqlaycaq üküm olacağına ümüt qalmadı. Ahtem Çiygozğa azatlıqqa çıqmağa yardım etecek tek bir yol bar – Ukraina akimiyetiniñ kirişmesi.
«Ümüt etemiz ki, Ahtem ve apiste yatqan diger siyasiy mabuslarğa olar küreşken devlet yardım etmege kelip. Ümütimiz bu, başqa çare qalmadı», – dep ayttı Çiygoznıñ ömür arqadaşı.
Ahtem Çiygoz 2015 senesi yanvar ayında 2014 senesi fevral 26-da Qırım Yuqarı Radasınıñ binası ögünde keçirilgen Ukraina topraq bütünligine qoltutuv mitinginde iştirak etkeni içün yaqalanğan edi. O vaqıt Rusiye tarafını tutqan, bu cümleden «Russkoye Yedinstvo» («Rus Birligi») firqası, miting iştirakçilerine qarşı çıqtı. İşğal olunğan Qırımnıñ Rusiye akimiyeti onı kütleviy çatışmalarnıñ teşkil etmesi ile qabaatlay.
Rusiye mahkemesi «Çiygoznıñ işini» «fevlral 26 işi» çerçivesinde, iyül 20-de mahkeme qapalı toplaşuvda «fevral 26 işini» ekige bölgen soñ oldı: ayrı – Ahtem Çiygoz boyunca, ve ayrı – cinaiy iş boyunca qabaatlanğan Ali Asanov ve Mustafa Degermenci boyunca.
