Link açıqlığı

Litvaniya Tışqı işler nazirliginiñ resmiy vekili Rusiye Anayasa mahkemesiniñ hadimleri Qırım işğali aqqında çıqarğan qararlarından sebep memleketke kirip olamağanını bildirdi. Bunı dekabr 6-da RBK neşiri haber etti.

«Qarar Rusiye Anayasa mahkemesiniñ 2014 senesi Qırım işğalini resmiyleştirgen mahkeme ükmünden sebep qabul etildi. Halqara uquq qaideleri sert bir şekilde bozulğan edi», – dep ayttı tışqı işler nazirliginiñ resmiy temsilcisi Kâstutis Vaşkelâviçüs.

Onıñ bildirgenine köre, Litvaniya bu qararnı Avropa birliginiñ bütün memleketlerine haber etti. Vaşkelâviçüs Rusiye Anayasa mahkemesiniñ hadimleri «uquqiy senetlerde belgilengen tedbirlerge köre» cedvelge alınğanını aydınlattı. Rusiye mahkemecileri bu qarardan Litvaniya mahkemelerinde şikâyet ete bile.

Mahkeme reberi Valeriy Zorkin mahkemeciler Rusiyeniñ Qırım işğali qararına qoltutqanlarından sebep memleketniñ «havfsızlığı içün telükeli» olğanına dair Litvaniyadan haber alğanını bildirdi. Rusiye prezidenti Vladimir Putin bu hulâsanı «idiot adımı» dep adladı. Putin «Anayasa Mahkemesi Qırımnıñ qoşulması aqqında qararnı Rusiye anayasasına köre qabul etkenini» bildirdi.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ işğal ve ihlâq etilmesini qanunsız areket olaraq tanıdılar. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG