Link açıqlığı

Saatnıñ esas haberi

Cemilev: işğalciler Qırımğa altı özek bombasını ketirdiler


Mustafa Cemilev, arhiv resimi
Mustafa Cemilev, arhiv resimi

Qırımtatar halqınıñ lideri, Ukraina millet vekili Mustafa Cemilev, «işğalciler Qırımğa özek silâsını ketirgenlerini, qırımtatar halqını ise yarımadadan çıqarmağa tırışqanını» beyan etti. Bunı o dekabr 6 künü Brükselde Avropa Parlamentinde, Qırımnıñ Rusiye tarafından işğal etilgenine dair muzakereler devamında ayttı, dep bildire UNİAN.

«Elde etkenimiz malümatqa köre, yarımadağa özek silâsı ketirildi. Qırımtatar Milliy Meclisiniñ haber hızmetleri, altı özek bombası kretirilgenini bile», – dedi Cemilev.

Onıñ sözlerine köre, şimdi Qırım «arbiy bazağa çevirilgen».

«Bizim qarşı cacuslıq hızmetlerimizniñ malümatlarına köre, anda şimdi 70 biñ arbiy insan, şu cümleden FSB ve polis, yerleştirilgen», – dep beyan etti Cemilev.

Cemilev dey ki, «Qırımnı arbiy usullarnen azat etmek çaresi yoq».

«Bizim fikirimizge köre, Qırımnı ancaq diplomatik yolnen, tecavüz etkeğe basqı yapıp, azat etmege mümkün olacaq. Eñ esas usullardan biri de – bu qattı sanktsiyalar», – dedi Cemilev.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ işğal ve ihlâq etilmesini qanunsız areket olaraq tanıdılar. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG