İşğal etilgen Qırımnıñ limanına kirgen «SKY MOON» gemisi Ukraina tarafından musadere etilmek mümkün. Bunı 6 dekabrde Ukraina Devlet sıñır hızmetiniñ matbuat-hızmeti haber etti.
«Geminiñ kapitanı ve erkânına para cezası berilmek mümkün ya da memuriy ceza olaraq 15 künge apiske oturtılmaq mümkünler. Memuriy işler endi qarar alacaq mahkemege teslim etildi. Başlanılğan cinaiy işke kelgende ise, qanunnı bozğan gemi de tutuldı ve devlet tarafından musadere etilmek mümkün», – dep aytıla bildirüvde.
Matbuat-hızmetinde qayd ettiler ki, «SKY MOON» – bu «Ukrainanıñ vaqıtınca işğal etilgen topraqlarınaki deñiz limannı ziyaret etkeni sebebinden bu kibi qattı ceza alacacaq birinci gemidir».
Noyabr 30, çarşenbe künü, Devlet sıñır hızmetiniñ «Grif» deñiz qoruma kateri Tuna özeniniñ ukrain tarafında «SKY MOON» deñiz yük gemisi (Tanzaniya bayrağı astında) 9 insanlıq erkânı ile yaqalandı. İnfrastruktura nazirliginiñ «Ukraina deñiz limanlar idaresi» devlet şirketi, bu gemi Qırım Muhtar Cumhuriyetiniñ vaqıtınca qapalı olğan limanına qanunsız kirgenini bildire.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ işğal ve ihlâq etilmesini qanunsız areket olaraq tanıdılar. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
