Aqmescitte dekabr 5-de «Çiygoz davasınıñ» daa bir mahkeme oturışı yekünlendi. Bunı Qırım.Aqiqat mühbiri bildire. Mahkemeciler keçken seferleri kibi Ahtem Çiygoznı mahkeme zalına ketirmege razı olmadı.
Advokat Nikolay Polozovnıñ aytqanına köre, Ahtem Çiygoznıñ mahkemede bulunma muracaatı – «kelecek içün bir iş, çünki Avropa mahkemesinde Qırım mahkemesi onıñ menfaatlarınıñ qorçalanmasını bütünley temin etmegenini aytmaq mümkün».
15 daqqalıq teneffüsten soñ prokuror delillerni tedqiq etüv tertibini deñiştirmege rica etken ve işniñ yazılı delillerini aydınlatqan: videolarnıñ prokolları, Meclisniñ «Rus birligi» firqası ile miting keçirilmesine dair şeer yolbaşçılığı ile yazışqanları.
«Qalğan zarar körgen ve şaatlarnıñ kelmegeninen bağlıdır», – dep qayd etti yaqalanğannıñ advokatı Nikolay Polozov.
«Çiygoz davası» tezce baqılmağa başlasa da, advokat 2017 senesine qadar mahkeme yalıñız qabaat tarafınıñ şaatlarını sorğuğa çekip olur, dep tahmin ete.
Polozovnıñ aytqanına köre, Çiygoz ömür arqadaşından ğayrı, başqa tuvğanlarınen körüşmese de, dayana. «Qırımtatar halqı içün anda yatqanını añlap dayana», – dep ayta advokat.
«Çiygoz davasınıñ» nevbetteki toplaşuvı dekabr 6-da keçirilecektir.
Dekabr 5-de toplaşuv prokuror keç qalğanından keç başlağan edi.
Ahtem Çiygoz 2015 senesi yanvar ayında 2014 senesi fevral 26-da Qırım Yuqarı Radasınıñ binası ögünde keçirilgen Ukraina topraq bütünligine qoltutuv mitinginde iştirak etkeni içün yaqalanğan edi. O vaqıt Rusiye tarafını tutqan, bu cümleden «Russkoye Yedinstvo» («Rus Birligi») firqası, miting iştirakçilerine qarşı çıqtı. İşğal olunğan Qırımnıñ Rusiye akimiyeti onı kütleviy çatışmalarnıñ teşkil etmesi ile qabaatlay.
Rusiye mahkemesi «Çiygoznıñ işini» «fevlral 26 işi» çerçivesinde, iyül 20-de mahkeme qapalı toplaşuvda «fevral 26 işini» ekige bölgen soñ oldı: ayrı – Ahtem Çiygoz boyunca, ve ayrı – cinaiy iş boyunca qabaatlanğan Ali Asanov ve Mustafa Degermenci boyunca.
