Link açıqlığı

Qırım «diversantlarınıñ» taqdiri: Panov, Zahtey ve Suleymanov qayda ve nasıl şaraitlerde bulunalar


Dört ay evelsi Rusiye Federal havfsızlıq hızmetiniñ (FSB) hadimleri Qırımda «diversantlarnıñ» birinci gruppasını yaqaladı. Olarnıñ arasında faal ve sabıq ATO göñüllisi Energodarlı Yevgeniy Panov, Qırımlı taksi aydavcısı Andrey Zahtey ve Aqmecitli Redvan Suleymanov bar. Olar SİZOda yatalar, tuvğanları olarnen körüşip olamay, advokatları ise bu davalarnen bağlı malümatnı gizli tutacaqlarına dair vesiqa imzaladılar. Qırım.Aqiqat olarnıñ apishane yaşayışınen bağlı bazı malümatlarnı ögrenip oldı.

Yevgeniy Panov ve Andrey Zahtey yaqalanğan soñ FSB diversion faaliyetinde şeklenilgen daa bir insannıñ adını aydınlattı – Aqmescitli Redvan Suleymanov. Bundan soñ Rusiye kütleviy haber vastaları uquq qoruyıcı organlarda olğan qaynaqlarınıñ malümatına esaslanıp, avgust ayında diversion faaliyetnen oğraşqan doquz insan yaqalanğanını bildirdi. Olarnıñ arasında – Harkovlı yük maşina aydavcısı Vladimir Prisiç. Qalğanlarınıñ soyadları alâ daa aydınlatılmay.

Yevgeniy Panov: SİZOdaki basqı ve ilk mektüp

Panovnıñ soy-sopları FSB hadimleri Qırımda apiske alınğannı basqığa oğratıp, sorğuğa çekkenini bildirgen ediler. Yevgeniyni Moskvadaki «Lefortovo» SİZOsına avuştırğan olsalar da, cinaiy işi yarımadada qaldı. Advokatları birden Aqmescit ve Moskvada çalışmağa mecburlar.

Evgeniy Panov
Evgeniy Panov

Eki ay devamında taqiqatçılar Panovğa tış dünya ile bağlanmağa imkân bermey ediler. Faqat keçenleri advokatları malümat gizli kalacaq dep, onıñnen körüşip oldı. «Diversantnı» Olga ve Dmitriy Dinze imaye eteler. Dmitriy Rusiyede mahküm etilgen ukrain rejisseri Oleg Sentsovnıñ menfaatlarını temsil etken edi.

Yevgeniy Panovnıñ qardaşı İgor Kotelânets dey ki, advokatlar davanı ögrenmege devam etip, apiske alınğan insanğa qarşı taqiqatçılar tarafından yapılğan qanunsız areketlerden şikâyet etecek ola.

Ukraina onı taşlap ketti, tuvğanları bile onı unutqanlar, bu sebepten de kelmegenimizni aytalar
İgor Kotelânets

İgor Kotelânetsniñ bildirgenine köre, SİZOda Yevgeniy Panovğa maneviy basqı yapıla. «Aman-aman er kün oña FSB federal kanallar üzerinden tarqatqan videoda bergen malümatlarından vazgeçmemege «yalvaralar». Kimsege kerekmey ve kimse oña yardım etemez, Ukraina onı taşlap ketti, tuvğanları bile onı unutqanlar, bu sebepten de kelmegenimizni aytalar. Biz baracaq olsaq da, izin alıp olamayıq», – dep ayta o.

Kotelânets Panovnıñ birinci mektübi kelgenini ayttı. «O, tuvğanları ve yaqınlarını qasevetlenmege mecbur etken büyük siyasiy oyunnıñ qurbanı olğanından er kesten afu soray. Er kesni sevgenini ve yardım içün teşekkürlerini bildirgenini yaza. O, onı bile. Ve soñunda onıñ sevimli «Yaşaycaqmız!» sözü. Birisi qıyın bir vaziyette qalsa, Jenâ «yeñermiz» ya da «yaşaycaqmız», dep ayta», – dep yaza yaqalanğannıñ qardaşı Facebookta.

Ukrainada Yevgeniy Panovnıñ Qırımda yaqalanmasını qaçıruv olaraq tasnif eteler. Ukraina Milliy politsiyası cinaiy taqiqatqa başladı.

Andrey Zahtey: sıcaq suvsız ve tsenzura altında

«Lefortovoda» Andrey Zahtey de tutıla. Onı advokatları İlnur Şarapov ve Aleksandr Popkov ziyaret ettiler. Popkov birden qayd ete, gizli subetleşme içün imkân yoq.

«Lefortovo» – sıcaq suv olmağan taqiqat izolâtorına beñzegen bir yer, amma qalğan şaraitler daa bir qarar. Zahteyniñ kamerasında televizor, buzdolap bar. Odada üç kişi qala bile, şimdi o da bir kişinen qala», – dep bildirdi advokat Popkov Qırım.Aqiqatqa.

O, mektüp yollay, amma olarnı alalarmı-yoqmı daa belli degil
Aleksandr Popkov

Advokat al-azırda SİZOda Zahteyge nisbeten bir de bir qanunsız areketler ve azap qullanılmağanını bildire. O, poçtanı da qullana bile, ve ömür arqadaşınıñ mektübini aldı.

«Mektüpler ala, amma «Lefortovoda» tsenzura bar, o, çoq şeyni qabul etmey. O, mektüp yollay, amma olarnı alalarmı-yoqmı daa belli degil», – dep bildirdi Popkov Qırım.Aqiqatqa.

Advokat dava malümatını aydınlatmamağa söz berdi. Yaqalanğannıñ areketleri bir gruppa erkânında diversion faaliyetniñ azırlanması (Rusiye Ceza kodeksiniñ 281-inci maddesi 2-nci noqtası) olaraq tasnif etildi. Advokatnıñ fikirince, Zahtey qabaatlanğan cinayet delilsiz ola.

Andrey Zahtey
Andrey Zahtey

Bazarertesi künü, dekabr 5-de, Moskvanıñ Lefortovo mahkemesi Andrey Zahteyniñ apiste yatma müddetini arttıra bile.

«Redvan yata ve oldı»

«Diversantlar» davasınıñ daa bir şahsı – Redvan Suleymanov – Aqmescitteki SİZOda qala. Tuvğanları onıñnen körüşip olamay, bunı olar QirimInfo neşirine bildirgenler. Bir şeyler yollamağa izin bar. Suleymanov dört aydan berli apiste yata, amma tuvğanları onı tek bir kere – avgust ayında, mahkeme zalında kördiler.

Advokat ne olğanını özü añlamay. O, iş bir qaç ayğa toqtatılğanını ayta. Soza-soza bir qaç ayğa toqtattılar. Şimdi Redvan yata ve oldı

Oña devlet advokatı berildi, amma soy-sopları iş taqiqatına dair bir şey bilmey. «Advokat ne olğanını özü añlamay. O, iş bir qaç ayğa toqtatılğanını ayta. Soza-soza bir qaç ayğa toqtattılar. Şimdi Redvan yata ve oldı», – dep aytalar olar.

Redvan Suleymanov
Redvan Suleymanov

Qırım «diversantları» davasınıñ daa bir şahsı – Vladimir Prisiçniñ – taqdiri belli degil. Uquq qorçalayıcı ve jurnalistler onıñ tuvğanları ya da imayesi ile bağlanıp olamaylar.

Panov-Zahtey «diversion gruppasınıñ» işi ne vaqıt baqılacaq belli degil. Advokatlarnıñ zanınca, taqiqat yarım yıldan bir yılğa qadar sozula bile. Dava şahısları ise apiste yatacaqlar. Advokatlar olarnıñ cezası deñişe bilecegine inanmay, çünki bu işlerniñ siyasiy sebepleri mevcuttır.

XS
SM
MD
LG