Özbekistanda devlet yolbaşçısı saylavlarında rey berüv ceryanı yekünlendi. Yerli saatke köre saat 20:00 bütün saylav bölükleri qapatıldı. Özbekistan Merkeziy saylav komissiyasınıñ bergen malümatına köre, saat 19:00 olğan sayıda saylayıcılarnıñ 86% (17 000 000 ya da daa ziyadesi) rey berdi.
MSK beyan etti ki, saylavlar devamında, neticege tesir etecek bozuvlar olmadı. Lâkin Radio Svobodanıñ özbek hızmeti «Ozodlik Radiosı» haber ete ki, bazı bölüklerde bozuvlar qayd etile edi. Böyle bozuvlar arasında – saylav bölüklerinde siyasiy fırqalar tarafından teşviqat alıp barılğanı ve bir şahıs tarafından bir-qaç insan içün rey berilgeni qayd etildi.
Özbekintandaki saylavlarğa OSCE öz nezaretçilerini yolladı. Lâkin, olarnıñ esabatları daa beyan etilmegen. Bundan evel OSCE vekilleri Özbekistanda keçirilgen iç bir saylavnı adaletli ve demokratik olaraq tanımağan edi.
Saylavlarnıñ ğalibi 59-yaşındaki Şavkat Mirziyayev olacağı beklenile. O 2003 senesinden berli Özbekistannıñ baş naziri edi, 8 sentâbden, İslam Karimovnıñ ölüminden soñ ise, prezident vazifesiniñ eda etecisi olaraq ilân etildi. Albu ki, kontitutsiyanıñ maddesine köre, bu vazife vaqıtınca parlamentniñ Aliy Meclis yolbaşçısına yüklenikmek kerek edi. Mirziyayev, ğalebe qazanacağı taqdirde, büyük derecede, evelki prezidentniñ siyasiy yöñelişini devam etecegini beyan etken edi.
Mirziyayevniñ raqipleri – Hotamjon Ketmonov (Halq-demokratik partiyası), Sarvar Otamuratov («Milliy Tikleniş» Demokratik partiyası) ve Narimon Umarov («Adolat» sotsial-demokratik partiyası).
Özbekistan Merkeziy saylav komissiyası, saylav bölükleri qapalğanınen, ilk neticelerni ilân etip başlaycağını beyan etti.
