Delabr 10 künü Aqmescitte, Qırım muendislik ve pedagogika üniversitetiniñ yanında çalışacaq Gençlerniñ çeşit etnik medeniyetler Merkezi qurulıp başlanacağı belgilene. Rusiye kontrolündeki Qırım akimiyetiniñ seslendirgen niyetine köre, Merkezde studetlerniñ yataqhanesi, sport kompleksleri, oquv ve boş vaqıt içün çeşit obyektler olacaqtır.
«Gençlerniñ çeşit etnik medeniyetler Merkezi üniversitet içün zarur meydançıq olacaq – onıñ sayesinde oquv yurtı Rusiye Federatsiyasınıñ diger subyektlerinden studentler deñişüv programmalarına qoşulıp olur, halqara tasil seminarlarını teşkil ete bilir, ve üniversitetniñ tam qıymetli yaşayışı içün kerekli olğan diger programmalarnı keçirip olur. Qırım muendislik ve pedagogika üniversiteti bügün dinamik surette inkişaf etken Aliy oquv yurtudır, onıñ divarlarından ihtisaslı ocalar çıqa», – dep qayd etken Qırımda milletlerara munasebetler ve sürgün olunğan vatandaşlarnıñ işleri boyunca Rusiye devlet komitetiniñ reisi Zaur Smirnov. Onıñ sözlerini müessiseniñ matbuat-hızmeti ketire.
Obyektniñ qurucılığı Qırımnıñ şimdiki yolbaşçısınıñ imayesinde, milletlerara birlikniñ küçlendirilmesi boyunca Federal programmanıñ çerçivesinde alıp barıla.
Farqlı esaplarğa köre, Qırımda 100-175 çeşir milletlerniñ vekilleri yaşay. Yarımada çoqmilletli olğanı aytıla, çoqluq arasında – ruslar, ukrainliler, qırımtatarlar, beloruslar, ermeniler, yeudiler, moldavlar, lehler, almanlar, yunanlar, bulğarlar, çingeneler qayd etile.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ işğal ve ihlâq etilmesini qanunsız areket olaraq tanıdılar. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
