AQŞ Kongressiniñ Temsilciler Meclisi 2017 senesi içün mudafaa bücetini qabul etti. Bu aqta vesiqa Kongressniñ sitesinde yerleştirilgen. Onda ayrıca, Rusiye ile eki taraflama arbiy işbirlikke masraf etmek – yasaq olğanı da yazıla. Bunı dekabr 3 künü Radio Svoboda haber ete.
Mudafaa saasında işbirlik, Moskva işğal etilgen Qırımnı Ukrainanıñ kontrolüne qaytaracağına qadar ve Donbasstaki ayrılıqçılarğa destek bermekni toqtatacağına qadar yasaq etilgen. Vesiqada qayd etile ki, yasaqnıñ lâğu etilmesi içün Rusiye Minsk añlaşmalarına riayet etmek kerek.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ işğal ve ihlâq etilmesini qanunsız areket olaraq tanıdılar. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
