Ukraina Prezidenti Petro Poroşenko, Qırım Muhtar Cumhuriyeti ve Aqyar şeeriniñ teleradiokompaniyalarına destek programmaları içün Ukrainanıñ Büjet kodeksine deñişmelerniñ kirsetilmesi aqqında Yuqarı Radanıñ qabul etken qanunına imza qoydı. Bu aqta malümat parlamentniñ sitesinde yerleştirilgen.
«2.12.2016 tarihında prezident imzası ile qaytarıldı», – dep yazıla bildirüvde.
Ukraina Yuqarı Radası noyabr 17-de olıp keçken umumiy toplaşuvında Ukraina Nazirler şurasına Qırım Muhtar Cumhuriyeti ve Aqyarnıñ teleradiokompaniyalarına devlet bücetinden maddiy yardım köstermege imkân berecek №5333 qanun leyhasını qabul etken edi.
Bundan ögüne Ukraina halq deputatı Refat Çubarov Yuqarı Radada çıqışta bulunıp, 35-36 million grivna maddiy yardım aqqında laf ketkenini aydınlattı.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ işğal ve ihlâq etilmesini qanunsız areket olaraq tanıdılar. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
