Link açıqlığı

Saatnıñ esas haberi

Çonğardan Qırımğa TV yayınlamağa isteyler


Ukrainanıñ TV ve radio yayınlav sualleri boyunca Milliy şurası Rusiyeniñ işğalinde bulunğan Qırımğa Çonğardan, DVB-T2 standartları boyunca, TV yayınlarını tarqatmaq içün kerekli dalğanı esaplamağa sımarladı. Bu aqta qarar Milliy şuranıñ toplaşuvında dekabr 1 künü qabul etildi.

Dijital yayınnı TV ve radio qulle vastasınen kerçekleştirmege niyetliler. Qulleniñ qurucılığı Çonğarda 2 dekabrde başlandı. Bunı Qırım.Aqiqatqa Ukraina TV ve radio yayınlav sualleri boyunca Milliy şura azası Sergey Kostinskiy bildirdi.

«Tahminen dört telekanaldan ibaret olacaq yerli multipleks meydanğa ketirmek niyetlimiz. O Genieçesk rayonına ve Qırımğa yetkizilecek», – dedi Kostinskiy.

Dekabr 2 künü Çonğarda TV ve radio qullesiniñ temeline birinci blok qoyuldı, qulleniñ yüksekligi 150 metr olacaqtır. Onı yılnıñ soñuna qadar qurıp bitirmege niyetliler. Dekabrniñ soñunda Qırım sakinleri gece-kündüz devamında çalışacaq dört ukrain radiostantsiyasını eşitip olacaqları beklenile.

Ukraina TV ve radio yayınlav sualleri boyunca Milliy şurası Herson vilâyetinde televizyon ve radio yayınlarınıñ inkişaf ettirilmesi ve işğal etilgen Qırımğa yayınlarnıñ tarqatılması içün mahsus strategiya leyhasını azırladı. Strategiyanıñ maqsadı – Herson vilâyetiniñ daa çoq yerine analog ve dijital yayınlarnı yetkizmek, ve işğal etilgen topraqladan çıqqan efir yayınlarını Herson vilâyetiniñ cenübiy taraflarına yibermemektir.

XS
SM
MD
LG