Link açıqlığı

Yaltalı «Hizb ut-Tahrir davasınıñ» iştirakçisi psihiatrik hastahanede buluna – ömür arqadaşı


Vadim Siruk

Vadim Siruknıñ Qırımnıñ 1 sanlı cumhuriyet klinik psihiatrik hastahanesiniñ 15-inci bölüginde bulunğanını tasdıqladılar, dep bildirdi dekabr 1-de Facebookta ömür arqadaşı Anna Bogaçeva.

«Bugün oña mal yolladıq. Hadimler aşlar berile, amma ötmek az deyler. Azbarnı çetten kördik, «sınavdan keçkenler» anda kezeler, belki. Diger şaraitler aqqında bir de bir malümat yoq», – dep yazdı Bogaçeva.

Dekabr 1-de Qırım advokatı Emil Kürbedinov Qırım.Aqiqatqa Siruk psihiatrik hastahanede buluna bile, dep tahmin etken edi.

«Şimdilik özümiz tasdıqlap olamayıq, amma dörtüncisi psihiatrik hastahanede buluna bile. Al-azırda Qırımda degilmiz, amma qaytqan soñ oña barsaq tasdıqlap olurıq. 99%-ğa eminim, böyledir», – dep qoştı advokat.

Noyabr başında Qırım advokatı Edem Semedlâyev bildirdi ki, «Hizb ut-Tahrir» davasınıñ qabaatlanğanlarına mecburiy psihiatrik ekspertiza yapılması belgilendi.

«Hizb ut-Tahrir» davasınıñ Yaltalı iştirakçileri yarım yıldan ziyade apiste yata. Birinci dört kişi 2016 senesi fevral 11-de yaqalanğan edi. Olarnıñ arasında İnsan aqları bağ gruppasınıñ azası Emir-Üsein Kuku da bar. Ondan ğayrı qurucılıqnen oğraşqan Aluşta sakini Müslim Aliyev ve Qızıltaş köyüniñ sakini Enver Bekirov, ve Yaltalı çeçek satıcısı Vadim Siruk da yaqalanğan edi.

Uquq qorçalayıcılar apiske alınğan Yalta sakinlerini siyasiy mabus olaraq tanıy.

«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.

XS
SM
MD
LG