Kreml kontrol etken Qırım müftisiniñ muavini Esadullah Bairovnıñ fikirince, gençlerni ananeviy islâmğa köre terbiye etmek kerek, onıñ zanınca, böyle olsa, radikal aqımlar peyda olmaz. Bunı müfti muavini Moskvadaki «21 asırda cemiyet birliginiñ pekitilmesi ve medeniyetlerara dialog inkişafında dinniñ rolü» halqara ilmiy-ameliy konferentsiyasında ayttı.
«Ananeviy islâm şeriat, beş vaqıt namaz, içki yasağı ve digerlerni belgilegen islâmdır, ananeviy islâm radikal islâmdan farqlana, çünki Allahnıñ dinini qorçalap, onı kirli radikal maqsadları ile qullanmay», – dep tekrarlay Bairovnıñ aytqanlarını Qırımdaki QAMDİ matbuat hızmeti.
Onıñ fikirince, ananeviy terbiye gençler arasında radikalizmniñ inkişafına yol bermez.
«Yañlış fikirler yoq olsa, gençlerge ananeviy islâm, urf-adetler sayğısı aşlanacaq ve qoqla radikal teşviqatçılarnıñ ayaqları altında bir şey qalmaz», – dep qoştı o.
2014 senesi Rusiyeniñ Qırım işğalinden soñ QAMDİ yapqan areketlerini Meclis ile muzakere etmey. Yanvar 16-17 künleri Herson vilâyetiniñ Geniçesk rayonında olıp keçken Dünya qırımtatar kongressi icra şurasınıñ toplaşuvında esas Ukrainada Müftiylikni qurmağa qarar alındı. Noyabr 19-da 14 qırımtatar din cemiyeti Kyivde toplaşіp, müftiylikni qurdılar. Müfti Ayder Rustamov oldı, o, Kyivdeki qırımtatar cemiyeti yanında Musulmanlarnıñ diniy qıymetleri komitetiniñ yolbaşçısı ola. Alimler şurası da quruldı, onıñ yolbaşçısı olaraq Ukraina musulmanları birliginiñ reisi Suleyman Hayrullayev saylandı.
