Link açıqlığı

«Fevral 26 davasınıñ» mahkemesi kene qaldırıldı – advokat


Edem Semedlâyev

«Fevral 26 davasınıñ» oturışı dekabr 2-ne avuştırıldı, mahküm etilgenlerden biri Arsen Yunusov hastahanege tüşti. Bunı noyabr 30-da Qırım advokatı Edem Semedlâyev Qırım.Aqiqatqa bildirdi.

Advokatnıñ aytqanına köre, noyabr 28-de ötkerilecek olğan mahkeme oturışı Arsen Yunusovnıñ hastalığından sebep avuştırılğan edi.

«Mahkeme taqiqatqa daa başlamadı, ilk toplaşuv ve muracaatlar oldı. Kelecek toplaşuvda dekabr 2-de zarar körgenlerge ve şaatlar davet etilmeli, olarnı sorğuğa çekecekler. Esnas iştirakçileri toplaşsa, mahkeme taqiqatı başlaycaq. Bir de bir qarar daa olmaycaq. Em prokuratura, em mahkeme şaatlar ve zarar körgenler sorğuğa çekilsin istey, tahminen 80 insan ola», – dep qoştı Smedlâyev.

Rusiyeniñ Qırım işğalinden soñ yarımadada 2014 senesi fevral 26-da Ukraina topraq bütünliginiñ tarafdarları mitinginde iştirak etken qırımtatar faallerini mahkeme etmege başladılar. Olarğa qarşı Qırımnıñ şimdiki yolbaşçısı Sergey Aksenovnıñ reberiyeti altında «Rus birligi» firqasınıñ faalleri çıqqan edi.

Rusiye mahkemesi «Çiygoznıñ işini» «fevlral 26 işi» çerçivesinde, iyül 20-de mahkeme qapalı toplaşuvda «fevral 26 işini» ekige bölgen soñ oldı: ayrı – Ahtem Çiygoz boyunca, ve ayrı – cinaiy iş boyunca qabaatlanğan Ali Asanov ve Mustafa Degermenci boyunca.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ işğal ve ihlâq etilmesini qanunsız areket olaraq tanıdılar. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG