Ukraina Mudafaa nazirliginiñ ATO sualleri boyunca temsilcisi Andriy Lısenko işğal etilgen Qırımğa yaqın yerlerde dekabr 1-2 künleri, bir şeyge baqmadan, arbiy idmanlar keçirilecegini beyan etti ve Rusiyeniñ raketa darbeleri ile qorqutuvları bu idmanlarğa keder etmeycegini ayttı.
«Ukraina – uquqiy ve mustaqil devlettir, bütün arbiy idmanlar tam belgilengen plan çerçivesinde ötkerile. Halqara añlaşmalarğa ve ihtarlarğa dair er şeyni – Ukraina eda etmekte. Bu normalarğa binaen, planlaştırılğan er şey amelge keçirilecektir», – dep Lısenko, Kyivte ötkerilgen matbuat-konferentsiyası devamında Radio Svobodanıñ sualine cevap berdi.
Onıñ sözlerine köre, Ukraina Mudafaa nazirligi ve arbiy silâ bünyecileri tarafından belgilengen planlarnıñ Ukrain topraqlarında amelge keçirilecegine er angi qorqutuvlar keder etmeycek.
Bundan evel, 25 noyabrde, Rusiye ava alan idaresiniñ resmiy sitesinde Ukrainanı qabaatlağan beyanat yerleştirilgen edi. Moskva Kyivni «vatandaş ve devlet uçaqları uçqan yerde» Qırım etrafında «bir taraflama olaraq» raketa atışlarını ötkemek qararını alğanında qabaatlay.
Ukraina Milliy telükesizlik ve mudafaa Şurasınıñ kâtibi Oleksandr Turçinov, Rusiyeniñ Federal ava naqliyat agentligi tarafından «Ukraina tarafı raketa silâlarınıñ deñemeleri vaqıtında Rusiyeniñ ava sıñırlarını bozğanı» aqqında beyanat sesledirilgenine cevap berdi. Ukraina MTMŞ kâtibi dey ki, bütün halqara añlaşmalarğa binaen, Rusiyeniñ öz ava sıñırları Qara deñizde – Keriç keçitiniñ ortasında bite.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ işğal ve ihlâq etilmesini qanunsız areket olaraq tanıdılar. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
