Qırım yarımadasında Ukrainanıñ bazı vatandaşları işğalden evel çalışqan yerde işine devam eteler. Bunı Rusiye advokatı Nikolay Polozov Qırım.Aqiqat Radiosınıñ saba yayınında ayttı.
«Olar (mahkemeciler – QA) sanki kerçekten sadıq olğanını köstereler, «bizler rusiyelimiz, daa yahşı, daa ziyade yapa bilemiz», dep isbatlaycaq olalar. Misal olaraq, Ahtem Çiygoz davasınıñ üç mahkemecisinden ekisi – ukrain mahkemeleriniñ sabıq hadimleri», – dedi o.
Nikolay Polozovnıñ aytqanına köre, Çiygoz davasınıñ üçünci mahkemecisi – mahkemeci Aleksey Kozırev mahsus Saratovdan keldi.
«5 yıl içinde onıñ bir dane bile aqlaycaq ükmü yoq, ve o, Qırım mahkemecilerine Rusiye adaletiniñ inceliklerini añlatıp, onı añlağanı kibi seviyesini kötere», – dep qayd etti advokat.
278 Qırım ve Aqyar mahkemecisine qarşı intizam taqiqatı açıldı, dep bildire Ukraina Baş prokuraturasınıñ matbuat hızmeti. UBP haberinde aytıla ki, intizam taqiqatı ant etkenine baqmadan Rusiye adından mahküm etken mahkemecilerge nisbeten keçirile. Taqiqatnı Ukraina Baş prokuraturasınıñ mektübi esasında Ukrainadaki tecribeli mahkemeciler komissiyası açtı.
Hatırlatıla ki, Ukraina Baş prokuraturasınıñ taqiqatçıları Qırım mahkemeleriniñ hadimlerine qarşı devlet hainlik maddesi boyunca cinaiy işlerni baqa. Bu madde 15 yıl apis cezası ve mal-mülkniñ tutıp alınmasını belgilemektedir.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ işğal ve ihlâq etilmesini qanunsız areket olaraq tanıdılar. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
