Qırımnıñ Rusiye akimiyeti Türkiye siyasetçileri ve iş adamlarınıñ işğal olunğan yarımada ziyareti çerçivesinde Türkiye ile parom ve uçaq seferleriniñ başlaması meselesini kötermege planlaştıra. Bunı Devlet dumasınıñ deputatı Ruslan Balbek RİA Novosti agentligine bildirdi.
«Parom, uçaq ve deñiz yolcu taşımaları aqqında laf etilecektir», – dedi Balbek.
Kezlev limanından parom işletmesi baqılacaqtır. Al-azırda Türkiyege Aqyar paromı qatnay.
Balbekniñ fikirince, böyle adım iqtisadiy leyhalarnıñ inkişafına yardım etecektir.
«Bağ ve naqliyat imkânları olsa, Türkiyeniñ iş leyhaları Rusiye Qırımında muvafaqiyet ile kerçekleştirilecektir», – dep qayd etti deputat.
Tünevin işğal etilgen Qırımğa Türkiye Cumhuriyetiniñ eyyeti kelip çıqtı. Erkânında deputatlar, siyasetçiler, ükümetten tış teşkilâtlarnıñ vekilleri ve iş adamları bar.
Ukraina Tışqı işler nazirligi çetel eyyetleriniñ Qırım ziyaretleri resmiy sayılmay, dep bildirgen edi. Nazirlik iyül 25-de bir muracaatnı derc etti, çetel vatandaşları ve vatandaşlıqsız şahıslarğa Qırımğa qanunsız şekilde barmaqtan vazgeçmege tevsiye etildi.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ işğal ve ihlâq etilmesini qanunsız areket olaraq tanıdılar. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
