Link açıqlığı

Saatnıñ esas haberi

«Hizb ut-Tahrir davasınıñ» eki iştirakçisi noyabr 24-de psihiatrik hastahanege avuştırılacaq – advokat


Advokat Emil Kürbedinov
Advokat Emil Kürbedinov

«Hizb ut-Tahrir davasınıñ» eki iştirakçisi Arsen Cepparov ve Refat Alimov noyabr 24-de mecburiy ekspertizadan keçmeleri içün psihiatrik hastahanege avuştırılacaqtır. Bunı noyabr 24-de advokat Emil Kürbedinov Qırım.Aqiqatqa tarif etti.

«Bugün Cepparov ve Alimovnı Müslim Aliyev olğan yerge alıp ketecekler – Aqmescitniñ 15 sanlı psihiatrik bölügine. Mecburiy ekspertizadan keçken er kes anda ketirile», – dep izaatladı Kürbedinov.

Noyabr 17-de belli oldı ki, yaqalanğan Müslim Aliyev mecburiy psihiatrik ekspertizağa yollanıldı.

«Hizb ut-Tahrir» davasınıñ Yaltalı iştirakçileri yarım yıldan ziyade apiste yata. Birinci dört kişi 2016 senesi fevral 11-de yaqalanğan edi. Olarnıñ arasında İnsan aqları bağ gruppasınıñ azası Emir-Üsein Kuku da bar. Ondan ğayrı qurucılıqnen oğraşqan Aluşta sakini Müslim Aliyev ve Qızıltaş köyüniñ sakini Enver Bekirov, ve Yaltalı çeçek satıcısı Vadim Siruk da yaqalanğan edi.

Uquq qorçalayıcılar apiske alınğan Yalta sakinlerini siyasiy mabus olaraq tanıy.

«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.

XS
SM
MD
LG