Link açıqlığı

Qırımda yazda yaqalanğan «diversant» Suleymanov dekabr soñuna qadar apiste yatacaq – advokat


Advokat Emil Kürbedinov

«Ukrain diversion gruppasında» iştirak etmesi ile qabaatlanğan Redvan Suleymanov Aqmescitteki Taqiqat izolâtorında nezaret altında buluna, onıñ işi taqiq etilmekte.

Bunı noyabr 24-de yaqalanğannıñ advokatı Emil Kürbedinov Qırım.Aqiqatqa bildirdi.

«Bugün Redvan Suleymanovnen körüştim, sağ, sağlam, Aqmescit SİZOsında yata. Dekabr soñuna qadar apiste qalacaq, al-azırda taqiqat keçirile. Onı terrorist ücümi aqqında yalan aytması ile qabaatlaylar. Taqiqatnı FSB alıp bara», – dep izaatladı Kürbedinov.

Rusiye kütleviy haber vastaları FSB malümatına esaslanıp, Redvan Suleymanov iyül 30-da Aqmescit ava limanında yaqalanğanını bildirgen edi. Avgust 12-de Federal havfsızlıq hızmeti Suleymanov sorğuğa çekilgen videonı Rusiye matbuat vastalarına yolladı. Yaqalanğan dey ki, 2015 senesi oktâbr ayında Zaporojye şeerinde ukrain istihbaratı oña iş teklif etti. Suleymanovnıñ aytqanına köre, oña arbiy tehnikasınıñ areketleri aqqında malümat toplamağa emir etildi, soñra ise patlav maddeleri qoyulacaq yerlerni Aqmescit vokzalında ve ava limanında tapmağa avale etildi.

Avgust 10-da FSB bildirdi ki, avgust 7-ne keçer gecesi Qırımda yarımadada teraktlarnı azırlağan «ukrain diversantları» yaqalandı. Bundan evel Rusiye sıñırcıları üç kün devamında yarımada ile memuriy sıñırdaki kiriş ve çıqış noqtalarını blok etken edi.

Ukraina akimiyeti Moskva bergen malümatını inkâr etip, Rusiye mahsus hızmetleri «provokatsiya» yapa, dep bildire.

XS
SM
MD
LG