Link açıqlığı

Saatnıñ esas haberi

Hersonda Şimaliy-Qırım kanalınıñ 107-nci kilometrinde bent baarge qadar azır olacaq


Şimaliy-Qırım kanalı, tasviriy resim
Şimaliy-Qırım kanalı, tasviriy resim

Herson vilâyetinde 2017 senesi baarge qadar Şimaliy-Qırım kanalınıñ 107-nci kilometrinde büyük bentniñ qurulması soñuna yetecegini bekleyler. Bunı 23 noyabrde «Ukrinform» haber etti.

«Şimaliy-Qırım kanalınıñ 107-ci kilometrinde bentniñ qurulıp bitirilmesi. Biz esas inşaatnı (temelli bentni – QA) Şimaliy-Qırım kanalına suv berilecegine qadar qurıp bitirmek kerekmiz. Biz añlaynız ki, pirniç östürgenler aprel ayında suvarıp başlamaq kerekler, Şimaliy-Qırım kanalı ise mart ayında Özü suvınen toldurıla. Yani biz, Şimaliy-Qırım kanalından suv yollamaq içün, mart ayına qadar inşaatnı teminlemek kerekmiz», – dedi bent qurucılığınen oğraşqan, Odesa suv hocalıq obyektleriniñ qurucılığı boyunca birleşken idare yolbaşçısı Georgiy Buziyan.

Herson vilâyetiniñ devlet memuriyet yolbaşçısı Andrey Gordeyevniñ sözlerine köre, bu bent keçken seneden berli qurula.

«Biz Çaplınka rayonunda, qoşma olaraq, suvarılacaq 7 biñ gektar peyda olacaq, Kalançak rayonında piniç östürmege imkân olacaq ve anda endi quruğan tıynaqlarda balıq baqmağa mumkün olacaq», – dedi o.

Buziyannıñ sözlerine köre, Şimaliy-Qırım kanalında temelli bentniñ qurulmasına 15 mln. 640 biñ grivnâ kerek olacaq.

«Yapılacaq işlerniñ kölemi bayağı büyük. 20-25 biñ kubometr topraqnı işlep çıqmağa kerek olacaq, maşna ve piyade yolunıñ köpürlerini qurup bitirmege, köterici-mehanizmlerniñ pekirilmesi içün galareya, çalışacaq hadimler içüm odalar qurulmaq kere», – dep añlattı o.

Buziyan aytta ki, iş grafigi kün devamında eki smena çalışacağını, ava vaziyeti uyğun olsa ise, gece-kündüz iş alıp barılacağını belgiley.

Yarımadanı Özü özeninen birleştirgen bu kanal vastasınen Ukraina Qırımnıñ suv ihtiyaclarınıñ 85 fayızını teminley edi. Qırım 2014 senesi Rusiye tarafından işğal etilgen soñ yarımadağa suv berilmesini toqtatıldı.

XS
SM
MD
LG