Hayser Cemilevni ömür arqadaşı ve anası Astrahanğa almağa ketecekler. Bunı noyabr 22-de advokat Nikolay Polozov QHA agentligine bildirdi.
Advokat hatırlattı ki, cuma künü, noyabr 25-de, qırımtatarlarnıñ lideri Mustafa Cemilevniñ oğlu Hayser Astrahanniñ 10-uncı apishanesinden çıqacaq. Polozov onı başqa apishanege avuştıracaqlarından qorqa.
«Başta onı başqa bir apishanege avuştırmağanlarını ögrenmek kerek. Anası ve ömür arqadaşı onıñ azat etilmesine Astrahanğa kelecekler. O, azatlıqqa çıqqan soñ ailesi nevbetteki areketlerini tüşünecektir», – dep ayttı advokat.
Hayser Cemilev 2013 senesi mayısta Bağçasaraydaki eviniñ azbarında babasınıñ silâsından qoranta tanışı Fevzi Edemovnı öldürmesi ile qabaatlana. Qırım işğalinden soñ Rusiye taqiqat organları işni ğayrıdan taqiq etmege qarar alğan edi. Hayserni Aqmescit SİZOsından Krasnodar ülkesine alıp kettiler.
Hayser Cemilev Astrahanniñ №10 apishanesinde cezasını çeke.
Rusiye mahkemesi sentâbr 15-de Hayser üç yıl devamında memuriy nezaret altında olacağını belgiledi. Çıqarılğan qararğa binaen, Hayser Cemilev Qırımdan çıqamaz, saat 22-den saba saat 6-ğa qadar Bağçasaraydaki yaşağan yerinden çıqamaz, işnen bağlı allar istisna ola. Cemilevniñ oğlu ayda eki kere «yaşağan yeri ya da qayd olğan yerniñ içki işler organına kelmege» mecburdır.
