Link açıqlığı

Lvivde «yeşil adamçıqlarnen» qum obası peyda oldı


KrımSOS cemaat teşkilâtınıñ esasçılarından biri Alim Aliyev

Lvivde noyabr 22-de Qırım işğaliniñ biñinci kününde Rusiye elçihanesi yanında cemaat-bediiy aktsiya olıp keçti, 1000 «yeşil adamçıq» qoyuldı. Bunı KrımSOS cemaat teşkilâtınıñ esasçılarından biri Alim Aliyev Facebookta bildire.

«Yarımada şeklinde qum obasını yaptıq, askerleştirme timsali olaraq ise biñ oyuncaq yeşil adamçıq qoyuldı. Birleşken Milletler ve Avropa Şurasınıñ Qırımdaki vaziyetke dair rezolütsiyalarından kâğıt uçaqlarını yapıp, Rusiyege dünya toplulığınıñ fikrini bildirmek içün olarnı elçihane azbarına uçurdıq», – dep yazdı Aliyev.

«Deli diktator askerlernen çoq oynap dünyanı unuttı, bu bunıñ timsalidir, bugün vatanımızda büyük bir arbiy alan meydanğa ketirildi, kün-künden insan aqları bozula», – dep qayd etti cemaat faali ve KrımSOS vekili Enver Bekirov Qırım.Aqiqatqa.

Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG