Qırımtatar Milliy Meclisiniñ reis muavini Ahtem Çiygoznıñ davası boyunca mahkeme oturışında Ümerov Eyvaz Asanoviç – 77 zarar körgen ve 48 qabaat tarafınıñ şaatından birincisi – Çiygozğa qarşı malümat berdi. Bunı noyabr 22-de advokat Nikolay Polozov Twitterde bildirdi.
«Qabaat tarafınıñ üçünci şaatı – Ümerov Eyvaz Asanoviç. Onıñ bergen malümatına köre, Çiygoz qırımtatarlarğa «bas», dep emir etken edi», – dep yazdı Polozov.
Polozov bildirdi ki, Qırımtatar Milliy Meclisiniñ reis muavini Ahtem Çiygoznıñ davası boyunca mahkeme oturışında «Donbasstaki cenk areketleriniñ iştirakçisi» sorğuğa çekildi.
Advokatnıñ malümatına köre, sorğu vaqtında belli oldı ki, şaat «Minasân Qırımnıñ yalı boyundaki «halq göñüllileriniñ» yolbaşçısı edi ve Donbasstaki uruşlarda iştirak etti».
Ahtem Çiygoz 2015 senesi yanvar ayında 2014 senesi fevral 26-da Qırım Yuqarı Radasınıñ binası ögünde keçirilgen Ukraina topraq bütünligine qoltutuv mitinginde iştirak etkeni içün yaqalanğan edi. O vaqıt Rusiye tarafını tutqan, bu cümleden «Russkoye Yedinstvo» («Rus Birligi») firqası, miting iştirakçilerine qarşı çıqtı. İşğal olunğan Qırımnıñ Rusiye akimiyeti onı kütleviy çatışmalarnıñ teşkil etmesi ile qabaatlay.
Rusiye mahkemesi «Çiygoznıñ işini» «fevlral 26 işi» çerçivesinde, iyül 20-de mahkeme qapalı toplaşuvda «fevral 26 işini» ekige bölgen soñ oldı: ayrı – Ahtem Çiygoz boyunca, ve ayrı – cinaiy iş boyunca qabaatlanğan Ali Asanov ve Mustafa Degermenci boyunca.
