Rusiye kontrol etken Aqmescitniñ Merkeziy rayon mahkemesinde noyabr 18-de prokuratura vekilleri 2014 senesi fevral 26-da Qırım parlamentiniñ binası yanında Ukraina birligi mitinginiñ beş iştirakçisine qabaatını aydınlattı. Bunı İnsan aqları malümat merkezi bildire.
Neşir qayd ete ki, mahküm etilgen Ali Asanov, Mustafa Degermenci, Arsen Yunusov, Eskender Emirvaliyev ve Eksender Kantemirov Rusiye akimiyeti tarafından 212-nci maddesiniñ 2-nci qısmı «Kütleviy çatışmalarda iştirak etme» ile qabaatlanalar.
Merkezniñ bergen malümatına köre, Ali Asanov vesiqanı añlamağanını, qabaatını tanımağanını bildirip, mahkemede malümat bermeycegini ayttı.
«Mustafa Degermenci cinayet tasnifini, Rusiye akimiyeti onı angi bir memleketniñ cemaat nizamını bozması ile qabaatlağanını añlamağanını bildirdi. O, vesiqada tam olaraq yazılmağan bir çoq şeyni qayd etti. O, bunıñ kibi bir qabaat oña endi seslendirilgen edi, dep ayttı, amma tam olaraq bir şey yazılmağanından Yuqarı mahkeme onı tekrar baqılmasına yollağan edi, bundan soñ da bir deñişme olmadı».
Malümat merkezi bildire ki, qalğanlar qabaatını qısmen tanıdı, amma çatışmalarda iştirak etmeleri evelden teşkil etilgenini inkâr ettiler.
«Bundan soñ mahkemeci Sergey Demenov deliller baqılacaq tertipni belgiledi, advokatlar ise zarar körgenler olmağanda bunıñ imkânsız olğanında israr ettiler. Belli bir cedvelge köre, yılnıñ soñuna qadar mahkeme taqiqatı çerçivesinde 8 toplaşuv olacaqtır», – dep qoştı İnsan aqları malümat merkezi.
Rusiye Qırımnı işğal etken soñ yarımadada 2014 senesi fevral 26-da Ukraina topraq bütünligi mitinginde iştirak etkenlerni mahkeme etmege başladılar. Olarğa qarşı o vaqıt Qırımnıñ şimdiki yolbaşçısı Sergey Aksenovnıñ reberiyeti altında «Rus birligi» çıqqan edi.
İyül 20-de mahkeme qapalı toplaşuvda «fevral 26 işini» ekige bölgen soñ oldı: ayrı – Ahtem Çiygoz boyunca, ve ayrı – cinaiy iş boyunca qabaatlanğan Ali Asanov ve Mustafa Degermenci boyunca.
Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
