Lâle qırımtatar bala telekanalına programma qavramındaki bozuvlarnı ve «korsanlıq alâmetlerini» tüzetmek içün Ukraina TV ve radio yayınlav sualleri boyunca Milliy şura tarafından «kiçik aralıq» muddet berildi. Bunı Qırım.Aqiqatqa Milliy şura azası Sergey Kostinskiy tarif etti.
«Bu, bozuvlarnıñ devam etilmesi içün yapılmay, vaziyetni tüzetmek içün, olar (Lâle – QA) ukrain qanunlarına köre çalışqanları içün yapıla. Olarda baza ile, maliye ile bağlı problemalar bar. Areketlerini tüzetmek içün olarğa vaqıt kerek», – dedi Kostinskiy.
O qayd etti ki, Milliy şura «körmemezlikke urmay, ceryanı kontrol ete», ve hatalarnı doğurtmaq içün belli muddetler ayırıldı.
Avgust ayında Ukraina TV ve radio yayınlav sualleri boyunca Milliy şura Lâle qırımtatar bala telekanalında nevbetten tış teşkerüv keçirmege qarar aldı. Plandaki nezaretniñ neticeleri buña sebep oldı. Neticelerge köre – milliy qısımnıñ eksimesi ve çetel programmalarnıñ arması, ve «korsanlıq alâmetleri» de tapılğan edi.
Lâle qırımtatar bala telekanalı ATR holdinginiñ qısımı ola. 2015 senesi 1 aprelden berli işğal etilgen Qırımda analog yayınlarını toqtattı, çünki rus litsenziyasını alıp olamadı. Soñra ATR öz yayınlarını qıtaiy Ukrainadan ğayırdan başlattı.
