Rusiyeli advokat Mark Feygin 21 noyabr künü Qırım.Aqiqatqa bergen izaatında qırımtatar halqınıñ lideri Mustafa Cemilevniñ oğlu – Hayser yaqınlarda azat etilecegini tasdiqladı.
«Hayser Cemilev bu cuma künü azat etilecek, çünki onıñ apis müddeti soñuna kelmekte», – dedi Feygin.
Ancaq advokat, Cemilevniñ oğlu azat etilecegi vaqıtta manialar çıqa bilecegini de red etmedi.
«Manialar er vaqıt çıqmaq mumkün, kimse sigortalı dekil ki. Azat etilgen soñ ise onıñ bulunacaq yeri – şimdilik sual (çünki memuriy nezaret astında bulunacağı belgilengen edi – QA) çezilmekte», – dedi Feygin.
Keçende Mark Feygin «Qırımlı esirlerden biri» azat etilecegini haber etken edi.
Hayser Cemilevni 2013 senesi onıñ Bağçasaraydaki eviniñ azbarında aileniñ dostı olğan Fevzi Edemovnı babasınıñ tüfeginden öldürgeninde qabaatladılar. Qırım işğal etilgen soñ rusiyeli taqiqat organları onıñ işini yañıdan baqmağa qarar aldı. Hayserni Aqmescit apishanesinden çıqarıp, Krasnodar vilâyetine alıp kettiler.
Hayser Cemilev 10 sanlı Astrahan apishanesinde buluna.
Rusiye mahkemesi sentâbr 15 künü Hayser Cemilevke üç yıllıq memuriy nezaret astında bulunmasını belgiledi.Çıqarılğan qararğa binaen, oña Qırımdan tış çıqmaq, işnen bağlı olğan vaziyetten ğayrı, saat 22.00-den saba saat 6.00-ğa qadar Bağçasarayda yaşağan yerinden tış bulunmaq, meyhane, qavehane, restoran ya da içkicilik yerlerinde bulunmaq yasaqtır. Cemilevniñ oğlu ayda eki kere «yaşağan yeri ya da qayd etilgen yeri boyunca içki işler organına» kelmek kerek.
