Ukraina Türkiyege, istiqrarlıq ve qattılıq ile Qırım sakinlerine destek bergeni içün teşekkür bildirdi. Noyabr 21 künü böyle beyanatnı Urkainanıñ Türkiyedeki elçiligi Facebookta yerleştirdi.
Elçihanede qayd ettiler ki, NATO toplaşuvında Türkiye prezidenti Recep Tayip Erdoğannıñ böyle sözleri ketirile: «Bizler içün Ukrainanıñ topraq bütünligi printsipi başından berli deñişmey edi. Biz Qırımda qırımtatarlarnıñ aqqalrınen bağlı vaziyetni devamlı taqip etmektemiz».
«Sözlerniñ areketlernen tasdiqlanması pek müimdir. Keçenlerde BMT Baş assambleyasınıñ toplaşuvında, Türkiye Qırımda insan aqların aqqında rezolütsiyağa qol tutqanı onıñ müellidlerinden biri olğanı – bunıñ bir misadir», – dep qayd ettiler ukrain elçiliginde.
Birleşken Milletler Teşkilâtı Baş assambleyasınıñ üçünci komiteti toplaşuvında noyabr 15 künü Ukraina teşebbüsi ile azırlanılğan «Qırım Muhtar Cumhuriyeti ve Aqyar şeerinde (Ukraina) insan aqlarınıñ vaziyeti» rezolütsiyası qabul etildi.
Mezkür rezolütsiyada BMT vesiqalarında ilk kere Rusiye «işğalci-devlet» olaraq adlandırıldı, Qırım Muhtar Cumhuriyeti ile Aqyar ise – «vaqıtınca işğal etilgen topraqlar».
Rezolütsiyağa 73 devlet qol tuttı, 23 – qarşı çıqtı, 76 – bitaraf qaldı. Qarşı rey bergenlerniñ arasında – Ermenistan, İran, Belorusiye, İndistan, Qıtay, Qazahistan, Rusiye, Özbekistan.
