Menlik inqilâbınıñ üçünci yıllığına bağışlanğan meresimler vaqıtında Kyivte terroristik telüke yüksek seviyede qala. Bunı Facebookta Ukraina İçki işler naziriniñ mesleatçısı Zoran Şkirâk bildirdi.
Onıñ sözlerine köre, Kyivte cemaat telükesizligini qorçalanmaq içün noyabr 21-22 künleri altı biñ uquq qorçalayıcı çalışacaq, bütün Ukrainada ise – on beş biñ.
Kyiv merkezinde noyabr 21 gecesi, akimiyet binalarına yaqın olğan bir-qaç soqaqta, şu cümleden – Hreşçatikte, naqliyat areketi sıñırlanıldı. Bunen beraber şeer merkezinde Milliy Gvardiya bölükleri yerleştirildi.
Noyabr 21 gecesi Milliy politsiyanıñ resmiy sitesinde yerleştirilgen beyanatta, Menlik ve azatlıq Kününde keçirilecek merasimlerde «uquq qorçalayıcılarnıñ areketlerine sayğı ile davranmaq ... ve yürüş yollarını, bazı soqaqlarnıñ qapatılğanını köz ögüne alıp, belgilemege» rica etile.
2013 senesi 21 noyabrde Ukrainada Yevromaydan başlanğan edi. Nikolay Azarovnıñ akimiyeti AB ile assotsiatsiya añlaşmasınıñ imzalanması içün yapılğan azırlıqlarnı toqtatmağa qarar alğanı – inqilâpqa sebep oldı. Narazılıqlar 2014 senesi fevral ayına qadar devam etti. Silâlı quvetler bir-qaç kere narazılıq aktsiyasınıñ iştirakçilerini quvmağa tırışqan edi.
Baş prokuraturanıñ malümatına köre, Yevromaydan devamında 2,5 biñ insan zararlandı, olardan 104 insan elâk oldı – çoqusı 2014 senesi fevralde. Soñra, narazılq aktsiyalarınıñ qurbanlarını Kök Yüzü Qaramanları olaraq anlandırdılar. İçki işler nazirliginiñ malümatına köre, 2014 senesi fevral 18 – mart 2 künleri arasında Kyivniñ merkezinde hızmet vazifelerini eda etkenleri vaqıtta 17 uquq qorçalayıcı elâk olğan edi.
