Varyag paromı Türkiyeden mal taşımalarını arttıra. Bunı noyabr 18-de RİA Novosti Krım agentligine «Qırım deñiz agentligi» müdiri Stanislav Gvozdilov tarif etti.
«Bugün parom üçünci kere Zonguldakta yüklene. Birinci seferge baqqanda mal eki qat arttı. Birinci kere Varyag 700 tonna portaqal ve mandarin ketirgen edi, bu sefer tsitrus ölçüsi 1,5 biñ tonnanı teşkil etti», – dep ayttı o.
Gvozdilovnıñ bildirgenine köre, Varyag Türkiyeden qurucılıq malzemeleri ve tehnikanı alıp kele.
Kreml kontrol etken Qırımdaki Rospotrebnadzor idaresiniñ inspektorları Varyag paromı Aqyarğa ketirgen 49 tonna portaqalnı Qırımğa almağa yasaq etti.
Noyabr 5-de Varyag paromı işğal etilgen Aqyarğa Zonguldaktan qaytqan edi. «Qırım deñiz agentliginiñ» müdiri Stanislav Gvozdilov bildirdi ki, gemi gemi 700 tonna portaqal ve mandarin, qurucılıq malzemeleri ve turmuş tehnikasını alıp keldi.
Oktâbr 29-da «Varyag» paromı Aqyardan Türkiyeniñ Zonguldak limanına kelip çıqtı.
2015 senesi avgust ayından noyabr ayına qadar Qırımnıñ Rusiye akimiyeti Aqyar ve Zonguldak arasında parom keçiti çalışqanını bildirgen edi. Naqliye bağları Rusiye-Türkiye munasebetleri kerginleşken ve Türkiye-Suriye sıñırında Rusiye cenk uçağı tüşürilgen soñ Rusiye prezidentiniñ buyruğı esasında toqtatıldı.
2014 senesi iyün ayında Ukraina işğal altındaki Qırımda gemilerni qabul etken deñiz limanlarını qapattı: Kezlevde, Keriçte, Aqyarda, Kefede, Yaltada; halqara teşkilâtlar da haberdar etildi.
2014 senesi aprel 27-de «Ukrainanıñ vaqtınca işğal etilgen topraqlarında vatandaşlarnıñ aq-uquqlarını teminlev ve uquqiy rejim aqqında» qanun işke tüşürildi, ceza kodeksine №332-1 maddesi kirsetildi. Maddede Ukrainanıñ vaqtınca işğal etilgen topraqlarına kiriş ve çıqış qaideleriniñ bozulmasından mesüliet qayd etilgendir.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
