Link açıqlığı

Aqmescitteki mektepke qırımtatar statusını bermege talap eteler – haber vastaları


Tasviriy resim

Aqmescitteki Borçoqraq qasabasınıñ sakinleri anda qurulğan mektepke qırımtatar statusıñ berilmesini talap eteler. Bunı noyabr 17 künü «Avdet» gazetası bildirdi.

Neşirde qayd ettiller ki, Aqmescitte qırımtatarlar toplu yaşağan Borçoqraq qasabasında «dört prezidentniñ» mektebi kibi belli olğan mektepniñ statusını belgilemek içün toplaşuv teşkil etildi.

«Akimiyet temsilcilerinden iç biri, mektepniñ statusı boyunca qasabanıñ sakinlerinen körüşüv keçirmegenine pek yazıqsınamız. Qırımtatar tili devlet tili sayılmaqta, ve qasabamızda esas eali – qırımtatarlar», – dedi toplaşuv iştirakçilerden biri İzzet Gafazov.

Neşirniñ malümatına köre, tolaşuv neticesinde, qurulğan oquv yurtına Qırım muendislik ve pedagogika universitetiniñ reberliginde qırımtatar tilinde tasil beren «Litsey-mektebi» statusını talap etmek qararı ile rezolütsiya qabul etildi. Ondan da ğayrı mektep müdiri ve ocalar taqımını, qasaba sakilneriniñ isteklerini esapğa alıp, işke qabul etmege talap etile.

«Mektep qurucılığı başlanğanda belgilengeni kibi, mektep müdiri qırımtatar tilini mükkemel seviyede bilmek kerek», – eminler toplaşuv iştirakçileri.

Yañı mektep 900 talebe qabul ete bilecek, «Rusiye Federatsiyasınıñ bütün şartlarına riayet etip», zemaneviy şekilde donatılacaq, ve şu cümleden yanğın telükesizlik sisteması ve video-nezareti olacaqtır.

Rusiye kontrolü astındaki Qırım ve Aqyar musulmanlarınıñ diniy idaresinde qırımtatar tiliniñ saqlanuvı ve inkişaf etilmesi problemasını qayd etken ediler.

Rusiye Qırımnı işğal etken soñ qırımtatar milliy mekteplerinde bile tasil rus tilinde alıp barıla, qırımtatar mektepleri ne oquv edebiyatı, ne de dersliklernen temin etilmegenler. Bunı er vaqıt Meclis vekilleri ve qıtımtatar cemaat teşkilâtları qayd eteler.

XS
SM
MD
LG