Ukraina Tışqı işler naziri Pavlo Klimkin, Rusiyeniñ işğal etilgen Qırımdan kimseni öz Arbiy küçlerine çağırmağa aqqı olmağanını bildirdi. Bunı Klimkin Parlamentte ötkerilgen Ükümetke süeller saatı devamında beyan etti, dep bildire Unian.
«Qırım boyunca BMT rezalütsiyasında zapt etilgen yerlerde işğalci-devletniñ arbiy küçlerine çağıruv keçirmege yasaq etilgeni qayd etile», – dedi ukrain naziri.
Klimkinniñ sözlerine köre, anda «halqara uquq qaidelerine binaen, zapt etken devletke çağıruv seslendirile. Bu – rezalütsiyanıñ kerçek neticelerinden biri, halqara uquqqorçalav mehanizmlerni işğal etilgen Qırımğa maniasiz yibermege talap etile», – dep qoştı siyasetçi.
Birleşken Milletler Teşkilâtı Baş assambleyasınıñ üçünci komiteti toplaşuvında noyabr 15 künü Ukraina teşebbüsi ile azırlanılğan «Qırım Muhtar Cumhuriyeti ve Aqyar şeerinde (Ukraina) insan aqlarınıñ vaziyeti» rezolütsiyası qabul etildi.
Mezkür rezolütsiyada BMT vesiqalarında ilk kere Rusiye «işğalci-devlet» olaraq adlandırıldı, Qırım Muhtar Cumhuriyeti ile Aqyar ise – «vaqıtınca işğal etilgen topraqlar».
