Qırım.Aqıqatqa Bergen izaatında Ukraina haber siyaseti nazirniñ birinci müavini Emine Ceppar Ukraina Yuqarı Radası tarafından noyabr 17-de №5333 qanun leyhasınıñ qabul etilmesini Nazirlik tarafından alıp barğan küreşniñ ğalebesi oalaraq tanıttı.
«Ukraina haber siyaseti nazirligi akimiyet toplaşuvlarında eki kere ATR telekanalına maddiy yardım köstermek meseleni kötergen edi. Nazirler şurası eki kere bizim teklifimiznen razı ola edi. Bizim noqta-i nazarımız buña esaslana edi – ATR üç tilde, başta bir qırımtatar tilinde yayın çıqarğan yekâne telekanal ola, ve o işğal etilgen Qırımdan çıqmağa mecbur oldı. Telekanalnıñ esas seyirceleri – Qırımlıñ tamır halqıdır, o işqalge qarşı kureşniñ haber meydanı olıp, Ukrainada qırımtatarlar içün, hususan tek qırımtatar tilinde TV seyir etken esli başlılar içün, bir penceredir oldı», – dedi Ceppar.
Nazirniñ birinci müavini qırımtatar telekanalına para ayırılmasınen bağlı bürokratik manialar aqqında da tarif etti, olardan sebep paralar alâ daa ayırılmadı.
«Para ne sebepten öyle de ayırılmağanı – bu sual artıq biznen bağlı degil. Para ayırılması içün mesüliyetli olğan – Maliye Nazirligidir, para saibi – İçtimaiy siyaset nazirligiola ve onıñ bücetinde qırımtatarlarğa yardım sermiyalarınıñ ayırılması endi belgilengen edi. Meclis bu paralardan bir qısımını ATR telekanalına ayırılmağa qarar alğan edi. Nazirler Şurasınıñ birinci toplaşuvından soñ Meclis vekilleri, Maliye nazirligi ve İçtimaiy siyaset nazirligi tehnikiy incelikler üzerinde çalıştılar. Amma mesele öyle de yerinden köçmedi. Bundan sebep bu meseleni ekinci kere köterdik, çünki vaqıt kete edi ve yıl da birmek üzere», – dep añlattı Ceppar.
Bütün bu meseleniñ soñunda Ukraina nazirler şurası parlamentke bücet ködeksinini doğurtqan qanun leyhasını kirsetti ve 2016 senesi içün Qırımdan çıqqan matbuat vastalarına maddiy yardım bermek içün yol açtı.
«Parlamentte leyhanıñ müzakere etilmesini ve rey berilüvini nezaret etip olamadım. Em de spiker tarafından Ukraina prezidentine imza qoymasıiçün nasıl leyha ketirilecegini de bilmeyim. Amma qanun leyhasınıñ qabul etilmesini Nazirligimiz tarafından alıp barılğan küreşniñ ğalibesi olaraq tanıyım», – dedi Ceppar.
Ukraina Yuqarı Radası noyabr 17-de olıp keçken umumiy toplaşuvında Ukraina Nazirler şurasına Qırım Muhtar Cumhuriyeti ve Aqyarnıñ teleradiokompaniyalarına devlet bücetinden maddiy yardım köstermege imkân berecek №5333 qanun leyhasını qabul etti.
Ukraina halq deputatı Refat Çubarov Yuqarı Radada çıqışta bulunıp, 35-36 million grivna maddiy yardım aqqında laf ketkenini aydınlattı.
Rusiye litsenziyasını almağanı sebebinden, 2015 senesi aprel 1 künü ATR telekanalı yarım adada ayınılmasını toqtattı. Bir talay vaqıt keçken soñ ATR qıta Ukrainadan işini devam etti.
