Aqmescitte noyabr 17-de «Çiygoz davasınıñ» 42-nci mahkeme oturışı keçirilmekte. Toplaşuvda qabaat tarafınıñ dört şaatı sorğuğa çekildi, dep bildirdi Ahtem Çiygoznıñ advokatı Nikolay Polozov Twitterde.
«Qabaat tarafınıñ bugünki birinci şaatı Kölesnikov Dmitriy Aleksandroviç. Vaqialar vaqtında – Ukraina İçki işler nazirliginiñ hadimi, al-azırda Rusiye politsiyasınıñ hadimidir. Ekincisi – Dorojkin Yuriy Vladimiroviç, «halq göñüllileriniñ» azası. Üçüncisi – Dubikovskiy Valeriy Stanislavoviç, «halq göñüllileriniñ» azası, üçünci rota. Dörtünci şaat olaraq Turçanenko Sergey Anatolyeviç sorğuğa çekile – al-azırda – «halq göñüllileriniñ» polk komandanı. 26.02.2014 Turçanenko deputat Valeriy Kosarevniñ yardımcısı ve «halq göñüllileriniñ» 1-inci rota azası edi», – dep yazdı Polozov.
Ahtem Çiygoz esnasında yüzden ziyade insan sorğuğa çekildi, iç biri oña qarşı bir şey aytmadı. Bunıñ kibi şaatlarnıñ celp etilmesi vaqianı büyük köstermek ve basqıncılıqnı qayd etmek içün yapıla, amma bu malümatlar ükümge tesir eteycektir. Bunı noyabr 15-de Çiygoznıñ advokatı Nikolay Polozov Qırım.Aqiqatqa tarif etti.
Ahtem Çiygoz 2015 senesi yanvar ayında 2014 senesi fevral 26-da Qırım Yuqarı Radasınıñ binası ögünde keçirilgen Ukraina topraq bütünligine qoltutuv mitinginde iştirak etkeni içün yaqalanğan edi. O vaqıt Rusiye tarafını tutqan, bu cümleden «Russkoye Yedinstvo» («Rus Birligi») firqası, miting iştirakçilerine qarşı çıqtı. İşğal olunğan Qırımnıñ Rusiye akimiyeti onı kütleviy çatışmalarnıñ teşkil etmesi ile qabaatlay.
Rusiye mahkemesi «Çiygoznıñ işini» «fevlral 26 işi» çerçivesinde, iyül 20-de mahkeme qapalı toplaşuvda «fevral 26 işini» ekige bölgen soñ oldı: ayrı – Ahtem Çiygoz boyunca, ve ayrı – cinaiy iş boyunca qabaatlanğan Ali Asanov ve Mustafa Degermenci boyunca.
