2020 senesine qadar «Qırımnıñ içtimaiy-iqtisadiy inkişafı» devlet programması çerçivesinde bir qaç tibbiy müessiseniñ qurulması belgilene. Bunı noyabr 17-de Kreml kontrol etken Qırım ükümetiniñ matbuat hızmeti bildire.
Hızmetniñ qayd etkenine köre, ilk leyha Aqmescitte büyük tibbiy merkeziniñ qurucılığını belgilemekte.
«Qurucılıqnı 2020 senesine qadar bitirmege planlaştırıla. Buña 9 mlrd ruble ayırılacaqtır», – dep qayd ete matbuat hızmeti.
Matbuat hızmetiniñ malümatına köre, ekinci büyük tibbiy merkez 2016 senesi dekabr ayında Yaltada açılacaqtır.
«Al-azırda «Yaltanıñ №1 şeer hastahanesi» alanında qurucılıq yerinde bina quruldı, qapatıldı, suv keçirile, elektrik teminlevi yapıla. Buña 1 mlrd ruble ayırılması belgilene», – dep bildire matbuat hızmeti.
«Bundan ğayrı, 2017 senesine qadar Qırımda 22 feldşer-ebanay noqtası ve 19 ekim ambulatoriyasını birleştirecek ağ qurulacaqtır. Buña 310 mln ruble berilecektir», – dep bildire hızmet.
Noyabr başında Kreml kontrol etken Aqyar ükümetiniñ matbuat hızmeti şeerde yılnıñ soñuna qadar «acele yardım» maşinaları 60%-ğa qadar yañartılacaq, dep bildirgen edi.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
