Bağçasaray rayonınıñ Hanışköy (Otradnoye) köyünde Şerif Ganiyevniñ evinde tintüv olıp keçti. Bunı Qırımtatar Milliy Meclisiniñ reis muavini İlmi Ümerov Facebookta bildirdi.
Ümerovnıñ aytqanına köre, Şerif Ganiyevniñ evinde ömür arqadaşınıñ qardaşı Emir Hasanov otura, onı hırsızlıq yapqanında şekleyler.
«Bu evde saibiniñ ömür arqadaşınıñ 20 yaşında qardaşı Emir Hasanov otura. O, din kütken musulmandır. Onı hırsızlıq yapqanında şekley ekenler, cinayet yerinde onıñ maşinası qayd etildi deyler. Gençni bölükke (angisine daa belli degil) alıp kettiler, maşinası ise ekspertizağa alındı. Tintüv vaqtında narkotik, silâ, yasaq etilgen edebiyat qıdırıldı», – dep aytıla Ümerovnıñ haberinde.
Qırımtatar Milliy Meclisiniñ reisiniñ birinci muavini Nariman Celâl bildirdi ki, «Aqmescit rayonınıñ Sofiyevka köyünde yerli iş adamı Yusuf ağanıñ evinde de tintüv keçirile. Sebebi şimdilik belli degil».
Qırım.Aqiqat tintüvler aqqında tafsilâtlı malümat almağa tırışa.
İşğalden soñ Qırımda mustaqil mühbirlerde, qırımtatar faallerinde ve Meclis azalarında kütleviy tintüvler sıq-sıq keçirilip başladı. Ukraina Tışqı işler nazirligi (TİN) işğal etilgen Qırımda ukrain vatandaşlarınıñ taqip etilmesinden qasevet çekkenini bildirdi ve basqıncılıqnı toqtatmağa çağırdı. TİN halqara toplulıqqa muracaat etip, Rusiye insan aqları ve ifade serbestligini bozmasın, ukrain siyasiy mabusları ve esirlerini azat etsin dep, oña qarşı bütün uquqiy ve siyasiy basqı usullarını qullansın istedi.
