Ukraina Yuqarı Radası noyabr 16 künü Avropa Parlamentini ve AB Şurasını «Ukraina vatandaşlarına Avropa Birligi tarafından vizasız rejimniñ berilmesi içün kerekli qararlarnı, uzatmayıp, 2016 senesiniñ soñuna qadar qabul etmege çağırdı». Bu aqta muracaat (№5394 sanlı ferman) içün 261 halq vekili rey berdi, eñ azı ise 226 rey kerekli edi.
Ukrain deputatları AB azaları olğan devletlerniñ akimiyetlerine muracaat etip, Ukrain vatandaşlarına AB memleketlerine qısqa müddetli ziyaretlerni keçirmek içün vizasız rejimniñ kirsetilmesine dair Avropa Komissiyasınıñ qanun tekliflerine qol tutmağa rica etti.
Keçenleri Ukraina prezidenti Petro Poroşenko dedi ki, Ukraina Avropa Birligi ile vizasız rejimni açmaq içün bütün kerekli şartlarnı yerine ketirdi, bu ceryan içinde qalğan sualler ise Ukrain tarafı ile bağlı degil.
Onıñ sözlerine köre, sadeleştirilgen viza rejiminiñ qabul etilmesi içün qıymet kesecek mahsus AB missiyası tarafından tasdiqlanğan bütün 144 islâatnı Ukraina endi amelge keçirdi. Bügünki künge qalğan sualler iç bir şekilde Ukrainanen bağlı degiller, meselâ, vizasız rejiminiñ toqtatıluv ceryanı. Bu sualler Avropa komissiyası ve Avropa Şurası arasında muzakere etile, dep qayd etti Poroşenko.
Ukraina vatandaşları içün vizalarnıñ qolaylaştırılması, yani «şengen» devletlerine qısqa müddetli ziyaretlerni keçirmek içün vizasız rejimniñ qabuletilmesi boyunca daa resmiy olaraq Avropa Parlamenti ve AB Şurası arasında ötkerilgen muzakereler neticesinde musbet qararnıñ alınılması kerek. Olar yaqın zamanda qabul etilecekleri beklenile.
Kyivte, noyabrniñ 24-ne qadar bunıñ yapılmasını bekleyler, o künleri «Uraina – AB» sammiti keçirilevek. Böyle taqdirde vizasız rejim 2017 senesiniñ başında ya da eñ keç – kelecek yılnıñ birinci çeriginde çalışıp başlaycağı tahmin etile.
