Geniçeskte ve Geniçesk rayonında, Herson vilâyetinde Arabat beli yanında yerleşken Strelkovoye yataqlarından alınğan gaz qullanıla, ve qoşma gazğa ihtiyaç yoq. Bunı Qırım.Aqiqat Radiosınıñ saba efirinde «Çernomorneftegaz» şirketiniñ müdiri Svetlana Nejnova bildirdi. O işğal etilgen Qırımdan gaznıñ yollanılması aqqında Qırımdaki rus akimiyetiniñ beyanatlarını red etti.
«Gaz şimdiki vaqıtta Geniçesk rayonı ve Geniçesk ealisini gaznen teminlemek içün yeterlidir. Atta bu vaqıtta arqaç gaz da bar, onıñ içün Qırımdan gaz alınmay, noqta. Bu iç te şubesiz», – dedi o.
Keçenleri Kremlge tabiy olğan Qırım akimiyetiniñ yolbaşçısı Sergey Aksönov Rusiye prezidenti Vladimir Putinge «Ukrainadaki Geniçesk şeerini Qırım gazınen teminlemege» teklif etken edi.
Noyabr 15-te Geniçesk rayonı devletlet memuriyetiniñ yolbaşçısı Aleksandr Vorobyov, Arabat belini ziyaret eter ekende, Azaq deñiziniñ yataqlarından Geniçesk rayonı içün kereginden çoq gaz çıqarılğanını bildirgen edi.
2016 senesiniñ başında, yanvar ayında Geniçesk gazsız qalğan edi. Arabat belindeki Strelkovoye yatağından sıcaq mevsimlerde çıqarılğan gaznıñ artqaçı Qırımda yerleşken gaz anbarlarına yollanıla edi, qızdıruv mevsiminde ise keri Geniçeskke qaytarıla edi. Endi ise, Vorobyovnıñ malümatına köre, gaznıñ artqaçını yaqalar.
