Salı künü, noyabr 15-de, Birleşken Milletler Teşkilâtı Baş assambleyasınıñ üçünci komiteti toplaşuvında Kyiv vaqtına köre saat 23:00 Ukraina teşebbüsi ile «Qırım Muhtar Cumhuriyeti ve Aqyar şeerinde (Ukraina) insan aqlarınıñ vaziyeti» rezolütsiyasınıñ leyhası boyunca rey berilecektir. Bu aqqında Ukraina Tış işler nazirligi bildire.
«Leyha maqsadı – vaqtınca işğal etilgen ukrain yarımadasında Ukraina vatandaşlarınıñ anayasa aqlarını qorçalamaqtır. Vesiqada işğal altındaki Qırımda insan aqlarınıñ kütleviy bozulması qayd etile ve Rusiye işğalci devlet olaraq halqara uquqqa uyğun bir şekilde şartlarğa riayet etmesine çağırıla», – dep aytıla nazirlikniñ haberinde.
«Rezolütsiyada Rusiyede qanunsız alda tutılğan Ukraina vatandaşlarınıñ azat etilmesi ve Qırımtatar Milliy Meclisini yasaq etme qararınıñ lâğu etilmesi qayd etile», – dep haber ete nazirlik.
Vesiqa Rusiyeni halqara uquq qorçalayıcı mehanizmlerine, ilk evelâ Birleşken Milletler Teşkilâtınıñ Ukrainada insan aqlarına riayet etilmesini nezaret etken missiyasını Qırımğa alıp, insan aqları vaziyetiniñ monitoringini keçirmek imkânını bermege çağıra. Vesiqada BMT insan aqları Yuqarı komissarınıñ İdaresine Qırım yarımadasındaki vaziyet aqqında ayrı bir esabat azırlamaq muracaatı mevcut.
Rezolütsiya leyhasınıñ müellifleri BMT azası olğan 41 devlet ola.
Al-azırda New Yorkta rezolütsiya leyhasınıñ qabul etilmesini teklif etken ukrain eyyeti erkânına Ukraina prezidentiniñ qırımtatar halqınıñ işlerinden vekâletlisi Mustafa Cemilev, Ukraina tışqı işler naziriniñ muavini Sergey Kislitsa ve Ukraina haber siyaseti naziriniñ birinci muavini Emine Ceppar kirmekte.
Ukraina prezidenti Petro Poroşenko BMT işbu rezolütsiyağa qoltutacağına ümüt etkenini bildirdi.
Rusiyede rezolütsiya leyhası «bir taraflı» olğanını aytıp, oña rey bermeycegini aydınlattılar.
