Ukraina Yuqarı Radası 2016 senesi Nazirler Şurasına eskiden Qırımda çalışqan teleradiokompaniyalarına para ayırmağa imkân berecek qanun leyhasını kün tertibine kirsetti. Bunı noyabr 15-de «Ukrayinska pravda» neşiri bildire.
«Vesiqa qabul etilse, istisna olacaq – ve Ukraina Nazirler şurası Qırım Muhtar Cumhuriyeti ve Aqyarda çalışqan teleradiokompaniyalarınıñ yayınlarına bücet sermiyasınıñ berilmesini belgileycektir», – dep qayd etti neşir.
Qayd etile ki, Ukraina baş naziri Volodımır Groysman bu deñişmeler vastasınen Qırımda çalışqan teleradiokompaniyalarına maddiy yardım kösterilmesinen bağlı meselelerni al etmege ümüt ete. Mında 2014 senesi fevral ayından olğan uydu bağı, kira, donatma borcları aqqında laf kete.
2015 senesi aprel 1-den başlap ATR qırımtatar telekanalı Rusiye litsenziyasını alamayıp, yarımadada işini toqtattı. Soñra ATR telekanalı esas Ukrainada yayınlarğa başladı.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
