Birleşken Milletler Teşkilâtı Qırımda insan aqları rezolütsiyasını qabul etip, işğal etilgen yarımadağa monitoring missiyasını yollasa, missiya azaları «devamlı ve diqqatlı çalışmağa» mecbur olacaq. Bunı qırımtatar halqınıñ lideri Mustafa Cemilev noyabr 15-de «Amerikanıñ Sesine» ayttı.
«Ümüt etem ki, BMT missiyası alınacaq (Qırımğa – QA), amma pek emin degilim. Bu missiya alınsa bile, stsenariy şöyle olacaqtır: olar işğalci akimiyet, satqınlar ile körüşir, olap ise işğal etilgen topraqlarda ne qadar «bahtlı» yaşağanını aytarlar, başqa bir fikirni seslendirmek pek telükeli. Anda diqqatlı çalışmaq kerek: bu bir ya da eki künlik iş degil», – dep ayttı Cemilev.
Mustafa Cemilev noyabr 14-de New Yorktaki matbuat konferentsiyasında Rusiye Qırımdaki insan aqları rezolütsiyasını körmemezlikke ura bile, dep ayttı.
Salı künü, noyabr 15-de, Birleşken Milletler Teşkilâtınıñ Baş Assambleyasınıñ Üçünci komitetinde (insan aqlarınen oğraşa) Ukraina teşebbüsinen «Qırım Muhtar Cumhuriyeti ve Aqyar şeerinde (Ukraina) insan aqlarınıñ vaziyeti» rezolütsiyasınıñ leyhası boyunca rey berilecektir.
