Link açıqlığı

AQŞ Rusiye Devlet dumasındaki Qırım deputatlarına qarşı ceza kirsetti


Örnek resim

AQŞ Maliye nazirligi Rusiye işğal etilgen Qırımda saylanğan Devlet dumasınıñ altı deputatına qarşı ceza kirsetti. Bunı noyabr 15-de Radio Svoboda bildire.

Devlet dumasındaki Qırım deputatlarını Ukrainada demokratik esnas ve institutlarnıñ bozulması ve memleketniñ mustaqilligi, havfsızlığı ve topraq bütünligini bozacaq areketlerde bağlı olması ile qabaatladılar.

Amerika nazirligi qayd ete ki, AQŞ Qırımda olıp keçken Rusiye Devlet dumasınıñ saylavlarını tanımaycaq.

Konstantin Baharev, Andrey Közenko, Svetlana Savçenko, Ruslan Balbev, Pavel Şperov ve Dmitriy Belikniñ Amerika Qoşma Ştatlarındaki esapları buzlatıldı, memleket vatandaşları ise olarnen iş tutmağa yasaq etildi.

Keçken afta mezkür deputatlar Avropa Birliginiñ ceza cedveline alınğan edi.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG