İslandiya Ukraina mustaqılligi ve topraq bütünliginiñ tarafını tuttı ve qomşu Rusiyege qarşı yaptırımlarnıñ devam ettirilmesiene qol tuttı. Bunı İslandiyanıñ Ukrainadaki elçisi Kristín Árnadóttir Ukraina Tışqı işler naziri Pavlo Klinkinnen körüşüv devamında beyan etti.
«Ukrainanıñ suveriniteti ve topraq bütünligine, ve Rusiyege qarşı yaptırımlarnıñ devam ettirilmesine dair İslandiyanıñ noqta-i nazarı deñişmey», – qayd etti Árnadóttir.
Nazirlikte qayd etkenlerine köre, noyabr 11 künü Árnadóttir İslandiya ükümet eyyetiniñ ziyaretinde reberlik yaptı. İslandiya Milliy energetik memuriyeti Ukrainanıñ geotermal potentsialı boyunca maruzasını taqdim etmek içün keldi.
İslandiya tarafı nazirni bu saada yapıla bilecek işbirlik aqqında haberdar etti, dep qayd ettiler müessisede.
2016 senesi oktabr 18 künü Ukraina ve Norvegiya işbirlik beyannamesini imzalap, Qırımnı zapt etilmesi ile Donbassta yapılğan agressiya sebebinden Rusiyeni takbih ettiler.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ işğal ve ilhaq etilmesini qanunsız areket olaraq tanıdılar. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
