Link açıqlığı

Canköyde pencerelerge baqmağa yasaq etip antiterroristik idmanlar keçirilecegi bildirile


Tasviriy resim

Noyabrniñ soñunda Canköyde «antiterroristik şekilde» idmanlar keçirilmek kerek. Bunı noyabr 10 künü Kremlin nezareti astındaki Canköy idaresiniñ matbuat hızmetinde bildirdiler.

Müessisede qayd ettiler ki, noyabriniñ üçünci onkünliginde demir yol vokzal meydanı, avtovokzal civarında ve yaqın yerlerde antiterroristik idmanlarnıñ keçirilmesi belgilene.

«İlân etüv, toplaşuv ve tahliye – nazariy olaraq keçirilecek, bildirüvni diñlep, iç bir tedbirler alınmamalı», – dediler matbuat hızmetinde.

İdmanlar vaqıtında Canköy sakinlerine evden çıqmamağa ve pencerelerge baqmamağa rica eteler.

«Foto ve video çekmege yasaq etile! Yasaqnı bozğanlar mesüliyetlikke celp etilecek», – dep yekünlerdiler müessisede.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ işğal ve ilhaq etilmesini qanunsız areket olaraq tanıdılar. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG