Noyabr 9 künü Rusiye Federal telükesizlik hızmetiniñ temsilcileri işğal etilgen Aqyarda sanki «Ukraina mudafaa nazirliginiñ İstihbarat baş idaresine bağlı olğan sabotaj-terroristik taqımınıñ azalarını» yaqaladı. Bunı müessiseniñ matbuat hızmeti bildire.
Matbuat hızmetiniñ bildirgenine köre, «sabotaj taqımınıñ azalarını» Qırım yarımadasındaki arbiy infrastruktura ve ayat teminleyici obyektlerde sabotaj areketlerini yapmağa planlaştıra edi.
«Tutıqlanğalnardan küçlü patlama tertibatları, silâ ve toldurıcılar, mahsus bağ aletleri ve olarnıñ cinaiy areketlerini isbaatlağan diger şeyler alındı, şu sırada yapılacaq sabotajlarnıñ harita-shemaları da bar», – qayd ettiler Rusiye FSB matbuat hızmetinde.
Müessisede bildireler ki, şimdiki vaqıtta yaqalanğanlar içün ceza tedbirler baqılmaqta, acele-qıdıruv areketleri ve taqiqat işi devam etilmekte.
Avgust 10-da FSB bildirdi ki, avgust 7-ge keçer gecesi «ukrain diversantları» taqımı yaqalandı, olar sanki Qırımda terakt azırlay ekenler. Bundan ögüne zapt etiilgen Qırımnıñ Rusiye kontrolündeki memuriy sınırnıñ keçitleri üç kün devamında qapatıla edi.
Ukraina ükümeti qabaatlavnı red ete ve yüz bergen vaqianı rusiyeli mahsus hızmetlerniñ «provokatsiyası» dep adlandıra.
Avgust 12 künü REN-TV rus telekanalınıñ sitesinde ukrainalı Yevgeniy Panovnıñ sorğudan keçirüv videosı peyda olğan edi ve o yerde o FSB-niñ bütün qabaatlavlarıını qabul ete. Bundan soñ uquq qorçalayıcıları yaqalanğannıñ bedeninde azaplarnıñ izleri qalğanını bildirgen ediler.
