Qırımtatar Milliy Meclisi reisiniñ birinci muavini Nariman Celâl işğal altındaki Qırımda yañı apis cezaları olacağını tahmin ete. Bunı Celâl noyabr 7-de KrımSOS cemaat teşkilâtına bergen izaatlarında ayttı.
«Yaqın vaqıtta bir sıra yañı apis cezası olacağını bekleymiz, faaller yaqalanacaqtır. Diniy sebeplerden taqip ve apis cezaları devam etecegini bilemiz. Uquq qoruyıcılar bunı açıq-açıq aytalar, Mamaq ve Boğurçadaki yaqalavlar «Hizb ut-Tahrir davasında» soñki olmağanını deyler. Bizge kirişmeñiz ve qorçalamañız olarnı, siz de zarar körersiñiz, deyler», – dep ayttı Celâl.
Oktâbr 12-de Qırımnıñ Mamaq ve Boğurça qasabalarında beş musulman qorantasında tintüv keçirildi. Beş qırımtatarı Rusiyede yasaq etilgen «Hizb ut-Tahrir» teşkilâtında iştirak etmesi ile qabaatlanıp yaqalandı: Rustem İsmailov, Uzair Abdullayev, Teymur Abdullayev, Emil Cemadenov, Ayder Saledinov.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
Ukraina Tışqı işler nazirligi (TİN) işğal etilgen Qırımda ukrain vatandaşlarınıñ taqip etilmesinden qasevet çekkenini bildirdi ve basqıncılıqnı toqtatmağa çağırdı. TİN halqara toplulıqqa muracaat etip, Rusiye insan aqları ve ifade serbestligini bozmasın, ukrain siyasiy mabusları ve esirlerini azat etsin dep, oña qarşı bütün uquqiy ve siyasiy basqı usullarını qullansın istedi.
