Noyabr 5-de Kyivde Qırımtatar kitabeti ve medeniyeti künü munasebetinen ukrain ve qırımtatar halqlarınıñ munasebetlerine dair tarihiy sanalaştırma kösterilecektir. Bunı Ukraina haber siyaseti nazirliginiñ matbuat hızmeti bildire.
Nazirlik qayd ete ki, 2016 senesi noyabr 5-de İvan Franko adına Milliy akademik drama teatrinde (Sergey Dançenko adına sana) Qırımtatar kitabeti ve medeniyetine bağışlanğan «Bir yol» adlı sanalaştırma olacaq.
«Maqsat – ukrain ve qırımtatarlarnıñ umumiy ğayeleri ve qıymetleri oğrunda küreşte olarnıñ birleşmesi müim olğanını qayd etmektir», – dep qayd ete aktsiya teşkilâtçıları.
Ukrain nazirliginiñ matbuat hızmeti qayd etkenine köre, sanalaştırmağa Ukraina baş naziri, nazirler, halq deputatları, Meclis vekilleri ve cemaat faalleri davet etildi.
«Teatr oyuncıları vesiqalı videolar, cemaat erbapları, ekspert, siyasetçi ve tarihçılarnıñ intervyüları esasında ukrain ve qırımtatar halqlarınıñ tarihiy munasebetlerini aks ettirecekler», – dep qayd ete nazirlik.
Nazirlik ilâve ete ki, sanalaştırmada ukrain ve qırımtatarlarnıñ işbirligi vaqıtlarınen beraber duşmanlıq sanaları da bar.
