Amnesty International halqara uquq qorçalayıcı teşkilâtınıñ Moskva ofisi kira parasını ödep, eñ yaqın vaqıtta işine ğayrıdan başlaycaqtır, dep bildirdi Reuters agentiligine Rusiye prezidentiniñ insan aqları şurasınıñ reisi Mihail Fedotov Vladimir Putin ile körüşken soñ.
Noyabr 2-de Amnesty International Moskvadaki ofisiniñ hadimleri işke kelip, kilitler deñiştirilgenini, qapular kitlengenini kördiler.
Moskva ükümeti Amnesty International teşkilâtı Rusiye paytahtında kirağa alğan bina içün para ödemey, dep bildirdi. Teşkilât vekilleri kira parasını ödegenine dair vesiqaları bar olğanını aytalar.
Amnesty International programmasınıñ Avropa müdiri Con Dalgusen bildirdi ki, teşkilât Moskva devlet mal-mülki departatmentiniñ yolbaşçısı Vladimir Yefimov ile bağlandı. O, hata ola bile, dep ayttı.
Dalgusenniñ aytqanına ökre, Yefimov Amnesty International temsilcilerini noyabr 7-de körüşüvge davet etti.
Soñki yılları Rusiyede çetelden maliye etilgen ve Kremlni tenqit etken uquq qorçalayıcılarğa basqı yapıla.
Amnesty International – Londrada qurulğan bir teşkilât, Rusiye akimiyetini insan aqlarını bozğanından sıq-sıq tenqit ete. O, Rusiye ve ortaqları Suriyeniñ Aleppo şeerine ava darbeleri vastasınen ücüm etip, bir çoq vatandaşnı öllüdirdi, dep aytqan edi. Moskvı bunı inkâr ete.
