Halqara seviyede Qırım mevzusına diqqat ayırılmasa, Rusiye akimiyeti qırımtatarlarnı qorçalağan advokatlar, faal, Qırımtatar Milliy Meclisiniñ azasına basqı yapmağa devam etecek. Böyle bir fikirni noyabr 3-de Rusiye advokatı Nikolay Polozov Qırım.Aqiqat ile paylaştı.
«Bunıñ bir maniası yoq. Qırımda olıp keçken adise-vaqialar halqara seviyede ciddiy bir şekilde takbih etilmey, men onı körmeyim. Rusiye akimiyeti er şeyni yapa bilecegini tüşüne, qırımtatarlar ve olarnı qorçalağan şahıslarğa qarşı repressiv siyaset devam ete bileceginden emin ola. Men müsbet bir şey körmeyim», – dedi Polozov.
Onıñ fikirince, halqara toplulıq diger meselege emiyet bere ve «qırımtatarlarnıñ vaziyeti, Rusiyeniñ Qırımda yapqan qanunsız areketlerini muzakere etmey».
Nikolay Polozov – Rusiyede ve işğal etilgen Qırımda bir çoq davada, şu cümleden Qırımtatar Milliy Meclisiniñ reis muavini Ahtem Çiygoznıñ işinde imayeci olğan Rusiye advokatıdır. Rusiye akimiyeti oña basqı yapqanını bildirgen edi.
Noyabr 3-de Polozov Qırımda oña nisbeten taqiqat tedbirleriniñ keçirilmesi içün mahkeme oturışınıñ künü belgilendi, dep bildirdi.
Qırım işğalinden soñ yarımadada mustaqil jurnalistler, qırımtatar faalleri ve Meclis azalarında tintüvler sıqlaştı. Ukraina Tışqı işler nazirligi (TİN) Ukrain vatandaşları işğal olunğan Qırımda taqip etilgenlerinden raatsız olğanını beyan etip, basqılarnı toqtatmapa çağırdı. Bunıñnen beraber TİN Dünya toplulığına muracaat etip, bütün mumkün olğan siyasiy ve uquqiy imkânlar ile Rusiyege tesir etmege, onıñ totalitar usullarınen insan aqları ve söz serbestligini yoq etmesini toqtatmağa, ve apis etilgen ukrain siyasiy mabuslarnı azat etmege çağırdı.
